-7 °С
Болотло
Антитеррор
Бөтә яңылыҡтар
Ғаиләм -ҡәлғәм
16 Декабрь 2020, 11:35

Татыу ғаилә - ил ҡото

Ғаилә бәхетенең нигеҙе - ир менән ҡатындың бер- береһенә ҡарата сабыр, игелекле, ихтирамлы булыуындалыр. Ә бит ныҡлы мөнәсәбәттәр бармаҡ сиртеү әҙере генә барлыҡҡа килмәй, уны булдырыу ҙур тырышлыҡ, фиҙаҡәрлек талап итә. Һәр йәһәттән үрнәк алырлыҡ булдыҡлы милләттәштәребеҙ - Юлиә һәм Искәндәр ӘҘЕҺӘМОВТАР ҙа тап ошондай фекерҙә. Эскерһеҙ мөхәббәттәрен юҡ- бар аңлашылмаусанлыҡтарға сарыф ҡылмай, берен-бере ҡәҙерләп, дәртләндереп торған, ҡатмарлы заманда үҙ эштәрен асып килем алырға ирешкән, йорт төҙөгән, балалар үҫтергән йәштәрҙең уртаҡ тормошо, йәшәү рәүеше, эшмәкәрлеге, ысынлап та, хайран ҡалырлыҡ.

Искәндәр сығышы менән Сибай ҡалаһы егете, Юлиә иһә үҙебеҙҙеке - Белорет һылыуы. Икеһе лә юғары бе­лемле, алдынғы ҡарашлы улар. Ғаилә башлығы Башҡорт дәүләт аграр уни­верситетының биотехнологиялар һәм ветеринар медицина факультетында уҡыған, аспирантура тамамлаған. Яҡшы өлгәшкәне өсөн Германия, Дания илдәрендә практика үтеп, бе­лемен камиллаштырып ҡайтырға ла форсат тапҡан (әйтергә кәрәк, Ис­кәндәргә сит илдә уҡырға ҡалыр-
ға тәҡдим итәләр, яҡшы стипендия вәғәҙәләйҙәр, әммә егет тыуған яғын һайлай. Сит илдә солтан булғансы, үҙ илеңдә олтан булыуың мең артыҡ, ти ул). Юлиә иһә туризм һәм сервис йүнәлеше буйынса дипломлы белгес.
- Университеттан һуң алған һөнә- рем буйынса Ҡырмыҫҡалы районын­да эш башланым. Тик 2014 йылда ғаиләм менән Белоретҡа күсеп килер­гә тура килде. Шул осорҙа ҡатыным сауҙа өлкәһендә үҙ эшебеҙҙе асып ҡарарға тәҡдим итте. Ҡаршы килмә­нем. Үҙәк баҙарҙа урын арендалап, тәүҙә Яңы йыл байрамына тәғәйен та­уарҙар менән һатыу иттек. Тора-бара өҫ кейемдәренә күстек. Баҙар менән генә мөрхәтһенмәй, тағы бер һатыу нөктәһен - ҡала үҙәгендә “Йәсмин” (“Жасмин”) өҫ кейемдәре магазинын да асып ебәрҙек, - ти Искәндәр шәхси
эшҡыуарлыҡ йәһәтенән һүҙ сыҡҡас.
Әлбиттә, бер башланғыс та еңел би­релмәй. Инде һатыу эше яйға һалынды тигәндә, пандемияға бәйле сикләүҙәр бәкәлгә һуға. Шулай ҙа төшөнкөлөк­кә бирелмәй Әҙеһәмовтар, ике һатыу нөктәһен берләштереп, сабыр ғына үҙ эштәрен дауам итәләр, тауар әйлә­нешен яйға һалып, ниһайәт, төшөмдө арттырыуға ла ирешәләр.
Дүрт бала - Йәсмин, Амира, Эмир­хан, Тимерйән менән мәж килгән Юлиә лә бөтмөрлөгө, тырышлығы менән хәләленә һәр йәһәттән терәк. Ваҡытында “Иҙел башы һылыуҡайы” титулын яулаған уңған хужабикә бө­гөн дә әүҙем тормош позицияһын юғалтмаған. Ҡатын-ҡыҙ һәр ваҡыт үҫеш, камиллашыу юлында булырға, күңелен илһамландырған, рухи
ҡәнәғәтлек килтергән шөғөл табырға тейеш, тип иҫәпләй ул. Башкөллө ғаилә мәшәҡәттәренә сумып, өс кенә йәшен тултырған Йәсминдәре янына мәленән алда тыуған игеҙәк сабый­ҙарын алып ҡайтҡанда ла, әле ҡул­дан да төшөп етмәгән кинйәләре Ти­мерйән менән төрлө сараларҙы биҙәү йәһәтенән үҙ эшен асып ебәргәндә лә Юлиә һис ҡасан көйһөҙләнеп, сабырһыҙланып йөрөмәй.
“Ғәжәп түҙемле, алтын аҡыллы минең һөйөклөм. Әлеге заманда был сифаттар айырыуса мөһимдер тип уйлайым. Юҡҡа-барға сарбайлама­уы, ниндәй генә хәл килеп тыумаһын, тыныслыҡ һаҡлай белеүе, зирәклеге менән күңелемә яҡын ул. Хәләлең йөҙөндә ышаныслы дуҫ, кәңәшсе та­быу - үҙе үк ҙур бәхет. Йәнә, бөгөнгө көндә һирәк кенә ҡатындар дүрт бала табырға тәүәккәлләйҙер... Ғөмүмән, ҡатынымдың яңы һыҙаттарын асҡан һайын уға нығыраҡ ғашиҡ булам. Ул - йортобоҙҙоң ҡото, именлеге, күңел донъябыҙҙың бөтөнлөгө”, - тигәйне Искәндәр ҡәҙерлеһе тураһында оло ихтирам менән.
Һөйгәненең рәссамлыҡ һәләтен, нәзәкәтле, зауыҡлы тәбиғәтен белеп, заманса фекер йөрөткән, кешеләге ыңғай потенциалды күрә белгән һиҙ­гер күңелле ир аҫылы уның ижадҡа һыуһап йәшәүен тойомламай буламы инде. Искәндәр ҡатынына декоратор сифатында үҙен һынап ҡарарға тәҡ­дим итә. Юлиәһе лә шуны ғына көт­кәндәй, ҡуш ҡуллап риза була. Шу­лай итеп, йәштәр тағы бер ҡыҙыҡлы йүнәлеште үҙләштереп, бөгөнгө көн­дә юбилей кисәләрен, туй тантанала­рын һәм башҡа сараларҙы биҙәй. Эш­мәкәрлектең дизайн, проектлау кеүек мөһим өлөштәрен Юлиә башҡарһа, Искәндәр иһә тантана залдарын биҙә­шергә ярҙам итә. Бәғзе ваҡыт кескәй Тимерйәнде лә үҙҙәре менән йөрөтөр­гә тура килә.
Мәҡәләнең дауамын гәзитебеҙҙең 99-сы (11 декабрь) һанында уҡығыҙ.