Муллыҡ биргән Мулдаҡай

Тәбиғәттең хозур ерендә - мәңге йәшел мәғрур шыршы-ҡарағайҙар, һалҡын һыулы, балыҡлы Ләмәз, ғорур Cәмиғтау, Ҡаршытау, Змейтауы ҡосағында урынлашҡан Мулдаҡай ауылы. Ауыл шул тауҙар араһында йәшеренеп кенә ултырғандай, әммә яҡынлашҡан һайын, Мулдаҡайҙың иркен ерҙе биләгәненә инанаһың. Бөгөн төпкөл ауылдарҙың йәшәйеше, бер яҡтан, һоҡландырһа, икенсе яҡтан, киләсәге бер аҙ хәүефләндерә. Ауыл ерендә кем нисек булдыра ала, шулай донъя көтә. Эш, уңайлыҡтар, мөмкинлектәр юҡ, тип зарланып ултырырға яратмай улар. Күпләп мал-тыуар, ҡош-ҡорт аҫрай, уңғандар ағын, емеш-еләген һата. Егәрлеләрҙең донъяһы ла етеш, өҫтәлендә ризығы мул. Шулай ҙа төпкөлдә йәшәүселәрҙең киләсәге нисек булырын уйлап, ирекһеҙҙән башҡа төрлө уйҙар килә. Ни тиһәң дә, төпкөл ауылдарҙа донъя көтөүҙәре еңелдән түгел. Халыҡ күпме генә тырышмаһын, ҡайһы бер сәбәптәр арҡаһында ауылдар һүнә бара. Сәбәптәр күп, әлбиттә. Ауылдың киләсәге булған мәктәптәр ябыла, башҡа учреждениелар үҙ эшен туҡтата. Йәштәр эш эҙләп, сит яҡтарға юл тота, ғаиләлеләре, балаларының киләсәген уйлап, төпкөлдән китә.