Ҙур булмаған цехтан - эре предприятиеға

Бының өҫтөндә 2014 йылдан алып "Урал спорт инвентары заводы" яуаплылығы сикләнгән йәмғиәте эшләй.

Предприятиены ойоштороу тураһында ҡарарҙы 10 йыл элек Магнитогорск дәүләт техник университетын тамамлаған Азат Вилданов ҡабул итә. Быға тиклем ул Башҡортостан, Силәбе, Мәскәү өлкәләрендә төрлө предприятиеларҙа инженер-конструктор, инженер, техник директор, генераль директор булып эшләй.

Урал спорт инвентары заводы ҙур булмаған цехтан башлана. Бөгөн был ҙур, заманса предприятие, уның төп етештереү ҡеүәттәре Сермән ауылында 3500 квадрат метр майҙанда урынлашҡан. Бында 80 кеше эшләй.

-Беҙ спорт һәм реабилитация продукцияһының киң ассортиментын эшләйбеҙ, шул иҫәптән мөмкинлектәре сикләнгән кешеләр өсөн. Предприятие динамик үҫешә. Былтыр 220 миллион һумлыҡ продукция етештерҙек, - ти Азат Вилданов.

Төрлө этаптарҙа предприятие дәүләт ярҙамы сараларынан: проект стартында муниципалитет субсидияһы, реабилитация техник саралары етештереүсе сифатында материалдар һәм төп саралар һатып алыуға субсидияларҙан файҙалана.

Бөгөнгө көндә завод 700-ҙән ашыу төр продукция сығара. Уның иҫәбендә фитнес-клубтар һәм йорт спорт залы өсөн тренажерҙар, дауалау физкультураһы һәм реабилитация өсөн ҡорамалдар, урам тренажерҙары һәм воркаут, скейт-майҙансыҡтар һәм спорттың уйын төрҙәре өсөн комплекстар, пауэрлифтинг өсөн ярыштар ҡорамалдары.

Предприятие махсус хәрби операцияла ҡатнашыусыларға һәм уларҙың ғаиләләренә ярҙам итеүҙә әүҙем ҡатнаша. “Атайсал” проектына ярашлы тәүгеләрҙән булып завод Сермәндә заманса балалар майҙансығы төҙөй, бының өсөн Башҡортостан Башлығының рәхмәт хаты менән билдәләнә. Бынан тыш, предприятие спортты үҫтереүгә индергән өлөшө өсөн Башҡортостан спорт министрлығының Рәхмәт хаты менән бүләкләнә. Уның етәксеһе "Йыл эшҡыуары" (2016 йылда) һәм ике тапҡыр "Башҡортостан Республикаһының социаль эшҡыуары" тип таныла.

“БАШИНФОРМ”.