Бөтә яңылыҡтар
Дөйөм мәҡәләләр
2 Апрель 2021, 14:03

"Зарница" илһөйәрлек тәрбиәләй

Ҡайҙалыр граната “шартлай”, икенсе ерҙә ҡабаланып палатка ҡорола, унан арыраҡ “яралыны” плащ-палаткала яу яланынан алып сығалар, кемелер Калашников автоматын һүтеп йыя, икенселәре иптәштәрен дәртләндереп тора... Тәү ҡарамаҡҡа Белорет автомәктәбе автодромы майҙаны хәрби хәрәкәттәр зонаһын хәтерләткән кеүек. Юҡ, бында тик район-ҡала мәктәптәре уҡыусыларының “Зарница” хәрбиспорт уйындары үтә. Буласаҡ һалдаттар сафта йөрөү, дөйөм хәрби һаҡланыу комплектын ваҡытҡа кейеү, командаларҙы үтәй белеү оҫталыҡтарын күрһәтеү менән бер рәттән ҡаршылыҡтар аша үтеү, гранатаны алыҫлыҡҡа ырғытыу, ваҡытҡа йүгереү кеүек физик күнекмәләр үтте, теоретик һорауҙарға яуап бирҙе.

Противогазды ҡулланып һаҡланыу комплектын ваҡытҡа кейеү, сафта йөрөү әҙерлеге, ҡаршылыҡтарҙы үтеү буйынса 20-се мәктәп уҡыусыларына етеүсе булманы. 21-се мәктәп уҡыусылары “Палатканы ҡороу”, “Тарихи белешмә” этаптарында еңде. Калашников автоматын иң тиҙ һүтеп йыйыусылар - Тимер юл мәктәбе. 16-сы мәктәп үҫмерҙәре урындағы тактик уйында иң етеҙҙәре булып билдәләнде. Шәхси зачеттарға килгәндә иһә, улар түбәндәгесә билдәләнде. Тимер юл мәктәбенән Дмитрий Юрочкин автоматты һүтеп-йыйыу, 20-се мәктәптән Виктор Машков спорт нормативының пресс, ошо уҡ мәктәптән Данил Лопухов ерҙән ҡалҡыныу, Егәҙе мәктәбенән Алик Ильясов гранатаны алыҫлыҡҡа ырғытыу, 21-се мәктәптән Ярослав Сергеев 30 метр арауыҡҡа ваҡытҡа йүгереү буйынса иң яҡшылары булды.
Дөйөм һөҙөмтәләр буйынса, беренселекте 20-се мәктәп кадеттары алды. Улар һәр этапта айырылып торҙо тиерлек. Әйткәндәй, тиҫтерҙәре, ҡунаҡтар алдынан байраҡ менән дә тантаналы сафта егерменселәр үтте. Икенсе урынды ике мәктәп - Тимер юл һәм 21-се мәктәптәренең йәш армеецтары бүлеште. Ә өсөнсөгә лайыҡлы рәүештә Егәҙе мәктәбе уҡыусылары сыҡты.
Тулы материалды гәзиттең 27-се һанында уҡығыҙ.
Читайте нас в