Июндә баҡсала нимә эшләргә?

Үҫентеләрҙе ултыртыу. Әгәр помидор, борос һәм баклажанды асыҡ тупраҡта үҫтерергә планлаштырһағыҙ үҫентеләрҙе күсерергә ваҡыт - урта һыҙатта 5 июндән һуң ҡырау төшмәй.

Орлоҡтар сәсеү. Ҡыяр, ҡабаҡ, ҡарбуз, фасоль һәм кукуруз кеүек йылылыҡ яратыусы культураларҙы 25 майҙан һуң асыҡ грунтҡа сәсергә мөмкин.

Картуф ултыртыу. Традицион рәүештә уны майҙың беренсе декадаһында ултырталар, әммә төрлө хәлдәр булыуы мөмкин - Интернет-магазиндан орлоҡтар һуңлап килә, майҙа һауа торошо мөмкинлек бирмәй йәки башҡа сәбәптәр. Картуфты 10 июнгә тиклем ултыртырға мөмкин. Йәй башында ултыртылған иртә сорттар көҙгө ҡырауҙар башланғанға тиклем уңыш бирә.

Кишерҙе һирәгәйтеү. Кишерҙе, ғәҙәттә, ҡуйы итеп сәсәләр, сөнки орлоҡтар ваҡ һәм уларҙы берәмләп сәсеү бик ауыр. Шуға күрә йәй башында үҫемлектәр араһында 4 сантиметр ҡалырлыҡ итеп һирәгәйтергә кәрәк. Әйткәндәй, йолҡоп алған кишерҙе айырым түтәлгә ҡайтанан ултыртырға мөмкин.

Помидорҙарҙың “мыйыҡтарын” алып ташлау. Әгәр үҫентеләрҙе баҡсаға май башында, ышыҡ аҫтына ултыртһағыҙ, хәҙер был эште атҡарырға ваҡыт. Ҡабырға “мыйыҡтарын” мөмкин тиклем иртәрәк (улар 4 сантиметр оҙонлоҡҡа үҫкәнсе)
алып ташларға кәрәк. “Яралар”ы тиҙерәк йүнәлһен өсөн тәүлек буйына һыу һибергә ярамай.

Ҡарағатты ашлау. Быны июнь уртаһында эшләргә кәрәк: 10 литр һыуға 1 литр тиҙәк (йәки 10 литр һыуға 0,5 литр ҡошҡорт тиҙәге). Һыу һибеү нормаһы - 1 ҡыуаҡҡа 2 биҙрә. Ҡалған еләк ҡыуаҡтарына һәм емеш ағастарына июнь айында өҫтәмә аҙыҡ кәрәкмәй, уларҙы иртәрәк бирәләр.

Еләкте ашлау. Уңыш йыйып алғандан һуң 2 аҙна үткәс, еләкте тиҙәк (концентрацияһы 1:10; ҡош-ҡорттоҡо өсөн - 1:25) төнәтмәһе менән туҡландырырға кәрәк. Нормаһы: 1 ҡыуаҡҡа 1 литр. Ашламалар менән һуғарыр алдынан бер тәүлек алда еләктәргә һыу һибергә кәрәк.

Редис, салат һәм башҡа тиҙ өлгөргән культураларҙың уңышын йыйғас, участка буш булмаһын өсөн, уларҙың урынына борсаҡ йәки йәшел тәмләткестәр сәсергә мөмкин.

Түтәлдәрҙе мульчаларға. Ул тупраҡты дым юғалтыуҙан һаҡлай. Мульча сифатында яңы үлән, бесән, һалам, ағас япраҡтарын ҡулланырға мөмкин.