-8 °С
Болотло
Антитеррор
Бөтә яңылыҡтар
Экология
23 Апрель 2019, 13:47

Газон һәм башҡалар

Республика Башлығы вазифаһын ваҡытлыса башҡарыусы Радий Хәбиров ярамаған урындарҙа автомобилдәрен ҡалдырып китергә яратыусыларға штрафтарҙы арттырыу ҡануниәтен кисекмәҫтән ҡабул итергә ҡушҡайны, депутаттар, икенсе һәм өсөнсө уҡыуҙы үткәреп, ҡабул итеп тә ҡуйҙы.

Газондарға ҡуйырға рөхсәт ителмәй. Нимә үҙгәрҙе һуң?
Газонда, балалар һәм спорт майҙансыҡтарында машина ҡуйған өсөн хәҙер аҡсалата яуап бирергә тура киләсәк. Физик шәхестәргә - 1-2 мең, вазифа биләгәндәргә 5 мең һумдан алып 10 меңгә тиклем штраф ҡаралған. Ә юридик шәхестәр был осраҡта 20-30 мең һум штраф түләргә тейеш. Икенсе тапҡыр тәртип боҙаһың икән, ике тапҡыр арттырып түләргә тура киләсәк.
Штрафтарҙы кем яҙа?
Закон буйынса административ комиссия протокол төҙөй һәм штрафтарҙы яҙа. Улар һәр муниципалитеттарҙа ла бар. Белорет районы муниципаль районындағы административ комиссия Ленин урамы, 71- се йорттоң 212-се бүлмәһендә урынлашҡан. (34792)4-57-73 телефоны буйынса бәйләнешкә инергә мөмкин. Ҡала һәм райондарҙа урынлашҡан административ комиссиялар тураһында мәғлүмәтте, бәйләнешкә инеү ысулдарын муниципалитет сайтының “Административ комиссия” бүлегендә табырға мөмкин.
Водителгә штраф һалһындар өсөн газонда ҡалдырылған автомобилде фотоға төшөрөп ебәрергә мөмкинме?
Эйе, мөмкин. Ошондай күренешкә юлыҡһағыҙ, кеҫә телефонына төшөрөү ҙә етә. Машинаның маркаһы һәм дәүләт номеры асыҡ күренергә тейеш. Автомобиль хужаһы “тимер атын” ҡайһы урамда һәм йорт алдында ҡалдырғанын иҫбатлаған фоторәсем дә яҡшы вариант. Әгәр ҙә автомобиль салонында хужаһының телефоны яҙылған ҡағыҙ ҡуйылған икән, уны ла фотоға төшөрөү кәрәк. Мөрәжәғәтнамә аноним булырға тейеш түгел. Гражданға махсус бланк тултырырға кәрәк буласаҡ (уны Юстиция буйынса дәүләт комитетының сайтынан алырға мөмкин). Бланкта уның исем-шәрифе, бәйләнеш телефоны, электрон почтаһы, шулай уҡ тәртип боҙоусыны ҡасан һәм ҡайҙа тотҡан, ҡайһы телефонға төшөргән кеүек мәғлүмәттәр тултырылырға тейеш. Ғариза, фото һәм видеоны административ комиссияның рәсми электрон адресына (kryto-97@mail. ru) ебәрергә йәки Ленин урамы,71, 212-се бүлмәгә шәхсән килтерергә мөмкин.
Ә халыҡ мөрәжәғәттәренең ҡаралғанын нисек белә ала?
Ялыу - рәсми мөрәжәғәт, ул “Рәсәй Федерацияһы граждандары мөрәжәғәттәрен ҡарау тәртибе тураһында”ғы Законға эләгә. Шуның өсөн ғаризала күрһәтелгән почтаға йәки адресҡа административ комиссия тарафынан ҡабул ителгән ҡарар тураһында ҡағыҙ киләсәк.
Ышаныс ҡағыҙы менән һатып ебәрелгән, йәки урланған машина өсөн кем яуап бирергә тейеш?
Әгәр ҙә фотоға төшөргән ваҡытта машина менән икенсе берәү файҙаланһа һәм быны иҫбатлап булһа, шул ваҡытта руль артында ултырған водителгә штраф һалынасаҡ. Был каршеринг компанияларға ла ҡағыла. Кеше машинаны ҡуртымға алып, газонда ҡалдырып киткән икән, штрафты ҡуртымға алыусыға түләргә тура киләсәк.
20 көн эсендә түләнгән штраф өсөн 50 процентлыҡ ташлама ҡаралғанмы?
Бындай ташлама юл хәрәкәте өлкәһендәге ҡайһы бер административ тәртип боҙоуҙар өсөн ҡаралған, әлбиттә. Ә газонда ҡалдырып кителгән машина өсөн ташлама юҡ.
Ә ниңә башҡа объекттарға менгән өсөн яуаплылыҡҡа тарттырмайҙар? Мәҫәлән, тротуарға.
Бындай штраф бар. Тротуарҙа ҡалдырылған машина өсөн 1 мең һум штраф ҡаралған. Бындай тәртип боҙоуҙар өсөн штрафты ЮХХДИ хеҙмәткәрҙәре һала.
Газонға килтерелгән зыян ҡараламы? Автомобилде эвакуациялайҙармы?
Юҡ, был статья буйынса яуаплылыҡ килтерелгән зыян күләменә ҡарамай. Машинаны ла алып китмәйҙәр. Газонда ҡалдырып киткән өсөн водителгә штраф ҡына килә.
“Газон” һүҙендә нимәне күҙ алдына килтерәбеҙ?
Йәшелләндерелгән биләмә тип үлән, сәскә, ағас-ҡыуаҡлыҡтар үҫкән һәм ҡаты япмалы юл менән киҫешкән урын һанала тип аңлата белгестәр.
Әгәр ҙә һорауҙар килеп тыуһа, ҡайҙа мөрәжәғәт итергә?
Яңы закон буйынса мәғлүмәттәр муниципалитеттың административ комиссияһында буласаҡ, ә тәртип боҙоуҙар булһа БР Юстиция эштәре буйынса дәүләт комитетының административ комиссиялар менән эшләү бүлегенә (347)218-10-34 телефоны буйынса мөрәжәғәт итә алаһығыҙ.