Гран-при - Белоретта

Башҡортостан Мәҙәниәт министрлығы, Театр эшмәкәрҙәре союзы, Республика халыҡ ижады үҙәге, Учалы муниципаль район хакимиәте ойошторған сарала бөтәһе 20 коллектив - Мишкә, Учалы, Ғафури, Дүртөйлө, Әбйәлил райондары, Белорет, Ағиҙел, Өфө, Межгорье, Күмертау ҡалалары, Силәбе өлкәһенең Арғаяш, Ҡурган өлкәһенең Ҡоншаҡ, Татарстан Республикаһы Аҡтаныш районы халыҡ театрҙары ҡатнашты. Беҙҙең ҡала Мәҙәниәт һарайының “Ирәмәл” башҡорт халыҡ, һәм йәштәр рус театрҙары сығыш яһаны. Спектаклдәрҙе Мәскәү, Силәбе, Өфөнән килгән күренекле режиссерҙар, театр белгестәре баһаланы.

Ҡала Мәҙәниәт һарайының “Ирәмәл” башҡорт халыҡ театры режиссеры Гөлнара Ғилманова сәхнәләштергән спектакль - Мостай Кәримдең “Ҡыҙ урлау” комедияһы иң юғары баһаға - Гран-приға лайыҡ булды. Межгорье ҡалаһының “Ҡарлуғас” халыҡ театры II Дәрәжә диплом менән бүләкләнде.

Театр байрамы ҡунаҡтар өсөн дә, учалылар өсөн дә онотолмаҫ хәтирәләргә бай булды.

- Шатлығыбыҙ сикһеҙ. Артистарыма рәхмәт. Учалы сәхнәһендә йөҙөп йөрөп тигәндәй, ихлас уйнанылар. Тамашасы беҙҙе яратып алҡышланы. Бәләбәй ҡалаһында үткән фестивалдә II урынды алып ҡайтҡайныҡ. Ниһайәт, еңеүгә лә өлгәштек. Ойоштороусыларға рәхмәт, тантананы асыу, ябыу бик матур тамашаға әүерелде. Шулай уҡ режиссерҙар өсөн оҫталыҡ дәрестәре, семинарҙар ҙа үткәрелде. Күсмә кубок беҙҙә, өс йылдан “Алтын тирмә” Белоретта үтәсәк, - тип шатлығы менән уртаҡлашты Гөлнара Насретдин ҡыҙы.

Белорет һәүәҫкәрҙәрен ихлас ҡотлайбыҙ! Яңынан- яңы спектаклдәре менән ҡыуандырып торһондар.