«Һеңлекәш» - Ишлелә

Ҡыуаныуым да иртәрәк булған икән. Буран ярып Ишлегә барып етеүгә, «Джентльмены удачи» фильмындағы кеүек, «Ут юҡ, кина не будет» тип ҡаршы алдылар. Шулай ҙа төшөнкөлөккә бирелергә тура килмәне, сөнки фильм геройҙары менән осрашыу ҙа ойошторолдо.

Иҙел башының Ишле, Хәсән ауылдарында төшөрөлгән «Һеңлекәш» фильмы ҡыҫҡа ваҡыт эсендә Рәсәйҙә генә түгел, элекке БДБ илдәрендә лә билдәлелек яулап өлгөрҙө. Башҡортостандың халыҡ шағиры Мостай Кәримдең «Беҙҙең өйҙөң йәме» әҫәре буйынса төшөрөлгән нәфис фильмды сит илдәр, шул иҫәптән Бөйөк Британия, Австрия тамашасыһы ҡараны. Төрлө конкурс-фестивалдәрҙә юғары баһаланған фильм, иң мөһиме, кино һөйөүселәр күңеленә үтеп инде.

Фильм республикабыҙ бер быуатлыҡ юбилейын билдәләгән йылда һәм халыҡ яҙыусыһының 100 йыллығы айҡанлы прокатҡа сығарылды. “Һеңлекәш” - Рәсәй кинематографының башҡорт телендә төшөрөлгән тәүге фильмы. Фильм төшөрөү майҙансыҡтарының береһе Ишле ауылында булды. Шуға ла осрашыуҙы осраҡлы тип әйтеп булмай. Төп ролдәрҙә уйнаған актерҙар ҙа ишлеләрҙең саҡырыуын ихлас ҡабул итеп алды. Ауыл халҡы, бигерәк тә Ишле, Олойылға, Туҡан мәктәптәре уҡыусылары осрашыуҙы ҙур түҙемһеҙлек менән көткән.

Нәфис фильм геройҙары менән осрашыу Ишле мәктәбендә үтте. Ысын мәғәнәһендә байрамға әүерелгән сараны мәктәп директоры Рима Вәлиева, урындағы хакимиәт башлығы вазифаһын башҡарыусы Эльвира Хәмәҙиева асты. Рима Әҡсән ҡыҙы уҡыусыларҙың һәм ауылдаштарының фильмда төшөү өсөн һайлап алыуҙы уңышлы үтеүҙәрен теләүен әйтеп үтте. Һәм уның теләктәре ҡабул булды - хозур тәбиғәтебеҙ, уның кешеләре кинокамералар объективына эләкте. Фильмда шулай уҡ мәктәп музейынан көнкүреш әйберҙәре генә файҙаланып ҡалмай, Геннадий Ведерниковтың китабынан материалдар, ауыл халҡынан реквизиттар ҙа алына. Кадрға урындағы дауахана бинаһы ла эләгә. БДУ-ның Мостай Кәрим исемендәге Ижади оҫтахана мөдире Нәфисә Билалова әҙиптең туғандарынан сәләмдәр еткергәндән һуң, ауыл мәктәбенә яҙыусының яңы ғына донъя күргән китабын бүләк итте. Ишле мәктәбе уҡыусылары һәм коллективы ла ҡунаҡтарҙы буш ҡул менән ҡаршы алманы. Улар ҙа музыкаль күстәнәстәр әҙерләгән. Мәҙәни сарала уҡыусылар башҡарыуында Мостай Кәримдең шиғри әҫәрҙәре, уның һүҙҙәренә яҙылған йырҙары яңғыраны.

Фильмдың төп геройҙарына һорауҙар күп булды. Баш ҡала ҡунаҡтары - Йәмил ролен башҡарған Арыҫлан Ҡырымсурин, уның кинолағы әсәһе Илгизә Ғилманова, өләсәһе Сулпан Абдрахимова (һүрәттә), һуҡыр өләсәһе ролен башҡарған Нәжибә Искәндәрова, эпизодтарҙа уйнаған ишлеләр Ольга Волкова, Михаил Рыжкин һәм Федор Севастьяновтар һорауҙарға яуап бирҙе. Актерҙар уйналған ролдәре, хыялдары, ғаилә хәле тураһында һөйләне. Мәктәп уҡыусыларының бигерәк тә Арыҫланға һорауҙары күп ине. Тиҫтерҙәре йәш һәм талантлы актерҙың дуҫтары, уҡыуы, роле, шөғөлдәре менән ҡыҙыҡһынды. Быйыл ғына уҡыуға барған Арыҫлан юғалып ҡалманы, һорауҙарға тулы, аныҡ яуаптар ҡайтарҙы. Осрашыуҙа ҡатнашыусылар Арыҫлан Ҡырымсуриндың уҡыуҙан тыш, бал бейеүҙәре, хип-хоп менән шөғөлләнеүен, йырға ла әүәҫ икәнлеген белде. Ул Рубик кубигын тиҙлеккә йыйыу менән дә мауыға. Хыялы - донъя рекордын ҡуйыу. Ә әлегә уның шәхси рекорды 24 секунд. Бәләкәй йондоҙ киләсәктә профессиональ актер, режиссер булырға теләй.

- Фильмда иң ҡатмарлы сәхнә күренеше йылғала булды. Оксана һеңлемә ярҙам итеү өсөн йылғаға төшөргә кәрәк ине. Йөҙә лә белмәйем. Шулай ҙа режиссер ҡуйған талаптарҙы үтәп сыҡтым, ауырыманым да. Дуҫтарым фильмда ҡатнашҡансы ла күп ине, һуңынан улар артты ғына. Фильмда төшөү оҡшаны. Артабан да дауам итер инем. Фильмдағы кеүек минең дә бәләкәй һеңлем бар, әле уға йәш ярым ғына, - ти тәьҫораттары менән уртаҡлашып йәш актер. Илгизә Ғилманова ла осрашыуҙы ойоштороусыларға рәхмәтен белдерҙе.

- Һеҙҙең яҡтарға тағы ла килеүебеҙгә шатбыҙ. Ишлелә ҡунаҡсыл халыҡ йәшәй. Шундай матур тәбиғәт ҡосағында йәшәйһегеҙ. Берҙәм көс менән барыһын да атҡарып сыҡтыҡ. “Һеңлекәш”те булдырыуға барыбыҙ ҙа күңел йылыһын һалдыҡ, - тине баш ҡала ҡунағы.