Ҙур финал алдынан төбәк һайлап алыу этаптарының береһе Белореттың 8-се мәктәбендә лә үтте, шаршамбы көндө Урал аръяғы ҡунаҡтарын Иҙел башы ҡаршы алды. Марафондың икенсе зона майҙансығында ҡатнашыусыларҙы белореттар былтырғы еңеүсе команда хоҡуғында ҡаршы алды, 2023 йылда "БелУчи" командаһы үҙ зонаһында I урын яулаған ине. Сарала уҡытыусылар бер урынға йыйылып, тәжрибә уртаҡлашты, уңыштары менән бүлеште, шулай уҡ белем биреүҙә үҙенсәлекле автор программалары менән таныштырҙы.
“Кәрәҙ-2024” республика педагогик марафонын "Мәғариф" милли проекты сиктәрендә Башҡортостан Республикаһының мәғариф һәм фән министрлығы “Педагогик лаборатория “Киләсәк мәғарифы” алдынғы белем биреү-ағартыу проекттарына ярҙам күрһәтеү һәм уларҙы төбәктә тормошҡа ашырыу һөнәри йәмәғәт ойошмаһы ярҙамында уҙғарылған марафонда Әбйәлил, Баймаҡ, Белорет, Бөрйән, Ейәнсура, Йылайыр, Учалы һәм Хәйбулла райондары, шулай уҡ Межгорье һәм Сибай ҡалалары командалары өсөн һайлап алыу туры үтте.
Педагогик марафонды ойоштороусыларҙың береһе, "Педагогик лаборатория “Киләсәк мәғарифы” төбәк йәмәғәт ойошмаһы рәйесе, Аҡмулла технопаркы директоры, “Кәрәҙ” марафонының программа директоры Сергей Переверзев марафондың биш төбәк майҙансығына бүленеүе, педагогик баш ҡалалар билдәләнеүе, осрашыуҙарҙың шунда үтеүен әйтеп китте.
Конкурс программаһы йыл һайын үҙгәрә, әммә команданы презентациялау мотлаҡ булып ҡала. Педагогтар үҙҙәренең иң яҡшы тәжрибәһе менән таныштыра, үҙҙәренең муниципалитеттары ҡаҙаныштары тураһында һөйләй. Артабан ҡатнашыусылар белем биреү сараһын төҙөү оҫталығын күрһәтә. Былтыр был берләштерелгән оҫталыҡ дәресе булһа, быйыл иһә дөйөм белем биреү программаһының бер предметы буйынса демонстрация нигеҙендә эшләнде.
Марафонды асыу тантанаһында Урал аръяғы педагогтарын Белорет районы хакимиәте башлығы урынбаҫары Юрий Точилкин, райондың мәғариф идаралығы начальнигы вазифаһын башҡарыусы Эдуард Камалов һәм урындағы мәғариф хеҙмәткәрҙәре профсоюз ойошмаһы рәйесе Светлана Нестерова сәләмләне. Үҙ сығыштарында улар был тәжрибә, оҫталыҡ байрамы һәм һәр педагог өсөн үҙенсәлекле ижади лаборатория буласағын һыҙыҡ өҫтөнә алды. Ҡала-райондың 39 белем биреү учреждениеһында ике меңгә яҡын педагог эшләй, әммә кадрҙар дефициты, ҡыҙғанысҡа ҡаршы, бар. Һөнәренең абруйын күтәреү өсөн "Йыл уҡытыусыһы" конкурсы үткәрелә, унда еңеү өсөн муниципалитет кимәлендә түләүҙәр күпкә арттырыла. Педагогтарға ярҙам итеү өсөн башҡа программалар ҙа эшләй.
Светлана Нестерова быуындар алмашыныуы һәм тәжрибә уртаҡлашыу темаһына ҡағылды, йәштәргә өлкән коллегаларының белеме һәм оҫталығы күсә, ә улар, үҙ сиратында, йәш педагогтар ярҙамында заманса технологияларҙы үҙләштерә. Тап ошондай хеҙмәттәшлектә юғары уңыштарға өлгәшергә мөмкин һәм Светлана Геннадьевна марафонда ҡатнашыусыларҙың барыһына ла ошо хаҡта теләктәрен еткерҙе.
Беренсе һынауҙың конкурс программаһында уҡытыусылар командаларын тәҡдим итеп, иң яҡшы уҡыусылары тураһында ҙур ғорурлыҡ менән һөйләне.
Балалар йәмәғәт берекмәләре менән үҙ-ара эш итеү һәм тәрбиә биреү буйынса директор кәңәшселәре - 14-се гимназиянан Марина Локоцкова, 1-се мәктәптән Вера Бубнова, 21-се мәктәптән Татьяна Демина, 20-се мәктәптән Любовь Киселева һәм 8-се мәктәптән Анна Фомина Иҙел башы намыҫын яҡланы.
Ирина Аверьянова, 17-се гимназияның уҡыу эштәре буйынса директор урынбаҫары, жюри ағзаһы:
Шулай итеп, IV “Кәрәҙ-2024” республика педагогик марафонының Белореттағы төбәк этабы үҙ эшен хәйерле сәғәттә йомғаҡланы. Конкурс һынауҙары һөҙөмтәһендә иң яҡшы педагогик практикаларҙан кәрәҙле бал йыйылды. Сара аҙағында педагогик марафон экперттары уҡытыусыларға дипломдар һәм ҡиммәтле бүләктәр тапшырҙы. Конкурс булғас, еңеүсе була: быйылғы марафонда ла Белорет районы командаһы алдынғылыҡты бер кемгә лә бирмәне. “Төбәк кәңәшселәре” I урынға һәм “Педагогик статус” номинацияһына лайыҡ булды. II урынды Учалы уҡытыусылары яуланы. Ейәнсура районы педагогтары III урынға лайыҡ булды.
“Кәрәҙ” - даими үҫешеүсе педагогик ижад марафоны, ул иң әүҙем белем биреү практикаһын асыҡлай. Бөтә сара дауамында эҙләнеү, асыштар, ижадта ҡатнашыу, уңыш атмосфераһы хөкөм һөрә, сағыу педагогик идеялар һәм перспективалы методикалар, үҙенсәлекле технологиялар тәҡдим ителә. Белорет районы командаһы 2025 йылдың февралендә Өфө ҡалаһында үтәсәк марафон финалында ҡатнашасаҡ.