Башҡортостан бренды - "Һөт кухняһы"

Белореттағы “Һөт кухняһы”ның таратыу пункттарында кеше бер ваҡытта ла өҙөлмәй. Белорет ҡалаһында урынлашҡан ике таратыу пунктында бюджет иҫәбенә бөтәһе алты йөҙҙән ашыу ғаилә һөтлө ашамлыҡтар ала.

Бында өс йәшкә тиклемге балаларҙың ата-әсәләре, йөклө һәм бала имеҙгән ҡатындар, аҙ тәьмин ителгән һәм баланы ҡарауға алған ғаиләләр бушлай һөт һәм һөтлө ашамлыҡтар өсөн килә. Махсус хәрби операция башланғандан алып был исемлеккә хәрбиҙәрҙең (шул иҫәптән өйҙәренә ҡайтҡандары) йөклө һәм бала имеҙеүсе ҡатындары, шулай уҡ уларҙың өс йәшкә тиклемге балалары ла өҫтәлде. Башҡортостанда махсус хәрби операцияла ҡатнашыусылар һәм уларҙың ғаиләләренә ярҙам итеү йылы тип иғлан ителгәндә, хәрби операция ветерандарының ғаиләләре бушлай "Һөт кухняһы" продукцияһына хоҡуҡ аласаҡ, был ҡулланыусыларҙы 1,5 мең кешегә арттырасаҡ. Республикала “Һөт кухняһы” Башҡортостан Башлығы Радий Хәбиров башланғысы буйынса 2019 йылдан алып эшләп килә.

“Республиканың 100 меңгә яҡын кешеһе 2019 йылдан "Һөт кухняһы" продукцияһын бушлай алды. Төбәктә 132 таратыу пункты эшләй, уларҙа балалар өсөн һөтлө ашамлыҡтар һатыла. Минеңсә, был беҙҙең эштең яҡшы һөҙөмтәләре. Бер нисә йыл элек урындағы сеймалдан файҙалы һәм тәмле аҙыҡ-түлек етештереүсе “Һөт кухняһы” балалар һәм өлкәндәр өсөн кәрәкле тигән һығымтаға килдек”,

тигәйне төбәк етәксеһе үҙенең телеграмм-каналында.

Дәүләт автономиялы учреждениеһы эшләй башлағандан алып республикала ете етештереү цехы ойошторолған. Башҡортостан муниципалитеттары биләмәһендә 132 таратыу пункты, шул иҫәптән 63 фирмалы таратыу пункты, дәүләт дарыуханалары базаһында 8 пункт, 61 мобиль таратыу пункттары бар. Әлеге ваҡытта “Һөт кухняһы” менән республикала 27 мең 904 кеше, шул иҫәптән 486 йөклө ҡатын, 621 имеҙеүсе әсә, 3 йәшкә тиклемге 25 616 бала һәм махсус хәрби операцияла ҡатнашыусыларҙың 1 181 ғаилә ағзаһы файҙалана. 2024 йылда етештереү күләме (дәүләт заказы): 10 399 563 һөт продукцияһы, шуның 4 930 531 - һөт, 4 014 481 - йогурт һәм 1 454 551 эремсек (порцияларҙа). “Һөт кухняһы”ның ассортименты ла киң, ул 32 төр продукция етештерә. Улар араһында - һөт, эремсек, бәләкәй балаларҙы туҡландырыу өсөн төрлө тәмле йогурттар, балалар печеньеһы. Ә 2024 йылдың июненән өлкәндәр һәм өс йәштән өлкән балалар өсөн яңы төр һөт ризыҡтары - ПЭТ-шешәләрендә һөт һәм кефир, ҡаймаҡ, эремсек сығарыла башланы.

Башҡортостан Башлығы Радий Хәбиров республика Сауҙа һәм хеҙмәттәр министрлығының һөт кухнялары селтәрен үҫтереү йәһәтенән эш һөҙөмтәлелеген билдәләне һәм ведомствоға етештереү ҡеүәтен арттырыу эшен дауам итергә ҡушты.- Беҙҙеке кеүек проект, ошондай форматта һәм ошондай етештереү күләме менән, илдә бер нисәү генә. Шуның өсөн “Һөт кухняһы” командаһына рәхмәт, - тип билдәләне Радий Хәбиров. - Хәҙер үҫеш өҫтөндә уйларға кәрәк. Ике төрлө йүнәлештә эшләргә мөмкин. Тәүге осраҡта тауарҙар ассортиментын киңәйтергә, яңы файҙалы һәм тәмле продукттар булдырырға, йәки икенсе - етештереү күләмен арттырып, яңы баҙарға сығыу вариантын ҡарарға була. Республикала һөт күп, уны эшкәртергә кәрәк. Һөт ризыҡтары менән бушлай тәьмин итеүгә ғаризаны күп функциялы үҙәктең бөтә офистарында йәки “Һөт кухняһы”н биреү пунктында бирергә мөмкин. Быйылғы йылдан алып документтарҙы “Дәүләт хеҙмәттәре” порталы аша электрон вариантта тапшырырға була.

Махсус хәрби операцияла ҡатнашыусыларҙың ғаилә ағзаларына һөт продукцияһын алыр өсөн Башҡортостандың хәрби комиссариатынан граждандың махсус хәрби операцияла ҡатнашыуын раҫлаған белешмә, поликлиниканан белешмә, паспорт күсермәләре, бала тыуыу һәм никах тураһында таныҡлыҡтар кеүек документтар кәрәк. Ғаиләнең килем кимәле иҫәпкә алынмай.Хәҙерге ваҡытта ғариза биреү процедураһы өсөн аҙ ваҡыт талап ителә, сөнки мәғлүмәттәр шәхси кабинетта автомат рәүештә тултырыла. Электрон документтар тиҙерәк эшкәртелә һәм ғаризаның статусын ҡарауҙың бөтә этаптарында ла күҙәтергә мөмкин.Дәүләт заданиеһын үтәүҙән тыш, учреждениеның бюджеттан тыш эшмәкәрлеген үҫтереүгә ҙур иғтибар бүленә.

Үткән йылдың июненән “Һөт кухняһы” өлкәндәр өсөн аҙыҡ-түлек етештереүҙе башлағайны. Өлкәндәр өсөн продукция, балаларҙыҡы кеүек үк, тулыһынса тәбиғи состав менән айырылып тора. Ул урындағы фермер хужалыҡтары тарафынан тәьмин ителгән нормалләштерелгән һөттән етештерелә, уға бер ниндәй ҙә яһалма ингредиенттар өҫтәлмәй һәм ул майҙың масса өлөшө буйынса билдәләнгән талаптарға тап килә. Продукт шулай уҡ яңыртылған “Хәләл” сертификатына эйә. 2024 йылда “Һөт кухняһы”нан балалар өсөн әҙерләнгән һөт “Рәсәйҙең иң яҡшы 100 тауары - 2024” абруйлы конкурсы лауреаты исеменә лайыҡ була, ә бер литрлы ПЭТ-бутылкаға һалынған 3,2% майлы пастеризацияланған эсемлек һөтө “Беҙҙең бренд” конкурсында Гран-при яулай. Бынан тыш, “Һөт кухняһы” 2023 йылғы Башҡортостан Хөкүмәтенең сифат өлкәһендәге премияһына дәғүә итеүгә республика конкурсы йомғаҡтары буйынса продукцияның һәм күрһәтелгән хеҙмәттәрҙең юғары сифаты өсөн икенсе дәрәжә диплом ала.

Учреждение үҙ үҫешенең бөтә аспекттары өҫтөндә, клиенттарҙың заманса ихтыяждарына һәм көтөлгәндәренә яуап бирерлек итеп, хеҙмәттәрҙе алыу өсөн мөмкинлектәрҙе яҡшыртып һәм бюджеттан тыш эшмәкәрлекте киңәйтеп, системалы эшләй.

Аҙнаһына ике тапҡыр льготалы категория граждандары һөт продукцияһын бушлай ала, ә башҡалар уны бер ниндәй ҙә сикләүҙәрһеҙ һатып алыу мөмкинлегенә эйә. Тәмле, юғары стандарттарға ярашлы, ҡәтғи сифат контроле аҫтында етештерелгән продукция халыҡ араһында киң билдәлелек яуланы ла инде. Белореттағы производствола һәм таратыу пункттарында 20 хеҙмәткәр эшләй. 2019 йыл аҙағында “Һөт кухняһы”н техник асыу үтте, бер нисә айҙан әҙер продукцияның беренсе техник партияһы әҙерләнде (һөт күләме 640 кг). 2020 йылдың 15 февралендә етештерелгән продукция күләме 835 килограмм тәшкил иткән, был һан йыл һайын арта бара. 2025 йылдың 1 мартына ҡарата һөт продукцияһын әҙерләү өсөн “Һөт кухняһы”на аҙна һайын 3 тоннанан 5 тоннаға тиклем һөт сеймалы килтерелә. Һөт, эремсек, персик, алма-груша, ер еләге, сейә тәме менән йогурттар, балалар баҡсалары өсөн йод өҫтәлгән йогурт етештерелә. Ике йыл элек етештереү цехында кальций һәм тимер менән балалар печеньеһы етештерелә башланы. Етештерелгән продукцияны һатыу ике фирма таратыу пункты аша тормошҡа ашырыла. Аҙна һайын Ҡағы, Сермән, Инйәр, Абҙаҡ һәм Межгорьеға һөт продукцияһын таратыу ойошторолған. Бынан тыш, Белорет районының һөт кухняһы аҙнаһына бер тапҡыр Өфө ҡалаһы халҡына һөт продукцияһын тарата. Өс йәшкә тиклемге балаларҙы һөт продукцияһы һәм тыуғандан алып ярты йәшкә тиклемге сабыйҙарҙы һөт ҡатышмалары менән тәьмин итеү алыусылар биргән документтар пакеты нигеҙендә тормошҡа ашырыла. Был продукцияны Белорет ҡалаһында Белорет, Әбйәлил, Учалы, Бөрйән райондары халҡы ала. Бөтәһе 3000 кеше хеҙмәтләндерелә, шул иҫәптән Белорет районында 800 кеше (600 кеше ҡаланан, ҡалғандары район буйынса),

тине “Һөт кухняһы” дәүләт автономиялы учреждениеһының Белорет подразделениеһы начальнигы, йәмәғәт лидеры, Дилә ҠОРБАНОВА.