Бөтә яңылыҡтар
Яңылыҡтар
4 Август 2021, 17:02

“Айыҡ ауыл”дарҙа спиртлы эсемлектәр һатылырға тейешме?

Башҡортостан йәмәғәтселеге “Айыҡ ауыл” республика конкурсында еңгән ауылдарҙа алкоголь һатыуҙы сикләү мөмкинлеген тикшерә.

Сатура Минһажитдинова
Фото:Сатура Минһажитдинова

Йәмәғәтселәр “Айыҡ ауыл” исемен йөрөткән биләмәлә йәшәгән  кешеләр сәләмәт тормош алып барырға тейеш тигән фекерҙә. Ауылдарға ингән ерҙә был ауылдың “Айыҡ” тип танылыуы һәм бында спиртлы эсемлектәр һатыу һәм файҙаланыу тыйыла тигән баннерҙар ҡуйыу кәрәк тиҙәр.

Йыл һайын еңеүселәргә 2-нән 5 миллион һумға тиклем сертификаттар тапшырыла, урындағы халыҡ уны төҙөкләндереү өсөн тотона. Яҡшы үҙгәрештәр өсөн урындағы хакимиәттәр ҙә үҙ өлөшөн индерә. Халыҡ дәртләнеп, әүҙемләшеп ҡала. 

“Ҡыҙғанысҡа ҡаршы, айыҡ тип танылған ауылдарҙа ла спиртлы эсемлектәр һатыу һәм эсеүҙе дауам итәләр, шул иҫәптән суррогат алкоголде лә. Улай булырға тейеш түгел. Улар үҙҙәренең исеменә тура килергә һәм ысынлап та спиртлы эсемлектәрҙе ҡулланмаҫҡа тейеш”,
тип иҫәпләй Дәүләт Думаһының VII саҡырылыш депутаты Зариф Байғусҡаров.

Уның фекере буйынса, был проблеманы ҡануниәт кимәлендә хәл итеп була. Башҡортостанда халыҡ ҡарары нигеҙендә аныҡ бер ауылда алкоголь һатыуҙы тыйыу рөхсәт ителгән закон ҡабул ителгән. Тик әлегә тиклем бер ауылда ла, шул иҫәптән “Айыҡ ауыл”дарҙа ла бындай тыйыу билдәләнмәгән.

“Ауыл халҡы башлыса спиртлы эсемлектәр һатыуҙы тыйыу яҡлы. Араларында быға ҡаршылар ҙа юҡ түгел. Ҡайһы бер ауылдар уйлашырға һәм ҡарар ҡабул итер өсөн ваҡыт һораған”,
ти депутат.

Был идеяны Бөтә донъя башҡорттары ҡоролтайы Башҡарма комитеты Президиумы ағзаһы, БДМУ профессоры, республиканың атҡаҙанған табибы Сәлиә Мырҙабаева ла хуплаған. Уның белдереүенсә, Бөтә донъя башҡорттары ҡоролтайында июндә үткән кәңәшмәлә тап ошо темаға арналған һөйләшеү булған.

“Беҙ йәмәғәтселәргә “Айыҡ ауыл” конкурсында еңгән ауылдарҙа спиртлы эсемлектәр һатыуҙы тыйҙырыуға өлгәшеүҙе тәҡдим итәбеҙ. Төбәк законы бындай мөмкинлек бирә, тик халыҡ сходы ҡарар ҡабул итергә тейеш”,
ти Сәлиә Мырҙабаева.

Айыҡ ауылдарҙа  алкоголь һатыуҙы тыйыу буйынса закон ҡабул итерҙән алда был мәсьәләне халыҡҡа сығарып, йәмәғәт фекеренә ҡолаҡ һалыу кәрәк. Юғиһә, “Айыҡ ауыл” республика конкурсында ҡатнашырға баҙнат итеүселәр булмауы мѳмкин.   

Автор:Сатура Мингажитдинова
Читайте нас: