Банк хеҙмәткәренә – рәхмәт

Банк бүлексәһенең иғтибарлы хеҙмәткәре ваҡытында хәлдең сетерекле булыуын һиҙеп ҡалып, 85 йәшлек пенсионер ҡатынға тупланмаларын һаҡлап ҡалырға ярҙам итә һәм был хаҡта шунда уҡ полиция хеҙмәткәрҙәренә хәбәр итә.

4 мартта Эске эштәр министрлығының район буйынса бүлегенә банк хеҙмәткәре Анастасия Климованан мутлашыу ихтималлығы тураһында хәбәр килә. Ул уларға бүлеккә пенсионерҙың үҙ иҫәбенән 200 мең һум аҡса алыу маҡсатында мөрәжәғәт итеүен аңлата. Ҡатын дауаланыуға аҡса кәрәклеген әйтә, әммә шул уҡ ваҡытта үҙен бик сәйер тота. Һорау алыу барышында ул бындай сумманы алыуҙың ысын маҡсаты тураһында бер ни ҙә әйтмәй. Иғтибарлы хеҙмәткәр пенсионерға бер нисә тапҡыр билдәһеҙ номерҙарҙан шылтыратыуҙар килеүен билдәләй.

Урынға килгән полиция хеҙмәткәрҙәре оло йәштәге кешене бүлеккә алып килә һәм уның  таныш булмаған кешеләр менән аралашыуын асыҡлай, улар үҙҙәрен Росфинмониторинг хеҙмәткәрҙәре тип таныштырған. Улар уны хәүефһеҙ иҫәпкә аҡса һалырға кәрәклегенә ышандырған.

Пенсионер ҡатын менән профилактик әңгәмә үткәрелгән, ә шылтыратыусыларҙың номерҙары “ҡара” исемлеккә индерелгән. Шулай уҡ был хәл тураһында ҡатындың яҡын туғандарына ла хәбәр ителә.

Халыҡ-ара ҡатын-ҡыҙҙар көнө алдынан  район буйынса эске эштәр бүлеге начальнигы, полиция полковнигы Тимур Сәйетгәрәев һәм уның урынбаҫары, полиция майоры Азат Абдуллин банкка килеп, Анастасия Геннадьевнаны яҡынлашып килгән байрам менән ҡотланы һәм әүҙем гражданлыҡ позицияһы һәм һөнәрилеге өсөн Рәхмәт хаты тапшырҙы.

Ксения СУЧКОВА, район буйынса эске эштәр бүлеге хеҙмәткәре.