Тантаналар дауам итә

Тәүге ҡотлауҙарҙы Белорет металлургия комбинаты ветерандары ҡабул итте. Улар өсөн туған предприятиелары байрам концерты әҙерләгән. Металлургтарҙың оло быуынын “БМК” йәмғиәтенең генераль директоры Сергей Федоров, комбинаттың ветерандар советы рәйесе Сергей Болонин һәм район хакимиәте башлығы Андрей Иванюта тәбрикләне.

Ҡала Мәҙәниәт һарайында комбинат коллективының иң яҡшы вәкилдәрен бүләкләү тантанаһы үтте. 189 завод эшсеһе федераль, республика, өлкә һәм муниципаль ведомстволарҙың, шулай уҡ корпоратив һәм профсоюздарҙың төрлө исемдәрен һәм наградаларын алды. Быйыл иң яҡшы хеҙмәт династияһы булып Ирбулдиндар ғаиләһе билдәләнде. Ғаилә 5 кешенән тора һәм уларҙың Белорет металлургия комбинатындағы дөйөм хеҙмәт стажы 115 йыл тәшкил итә.

Шулай уҡ комбинаттың иң яҡшы 48 эшсеһе һәм 16 белгесе билдәләнде. Йәмғиәттең 10 эшсеһенә “БМК” акционерҙар йәмғиәтенең хеҙмәт ветераны” исеме тапшырылды. БМК цехтарының дүрт коллективы “Иң яҡшы хеҙмәт коллективы” исеменә ярышта еңеүе уңайынан бүләкләнде. Еңеүсе коллективтарға предприятие үҫешенә ҙур өлөш индергән элекке директорҙар - Василий Овчаренко, Петр Осетров, Николай Дроздов һәм Вадим Кулеша исемендәге күсмә вымпелдар тапшырылды. Бынан тыш, алдынғы 66 хеҙмәткәрҙең һәм 3 сменаның фотоһүрәттәре комбинаттың Почет таҡтаһын биҙәйәсәк.

“Мечел” төркөмөнөң 20 йыллығы һәм һөнәри байрамдары уңайынан “Нытва” акционерҙар йәмғиәтенең һауыт-һаба йыйылмаһы 20 завод эшсеһенә тапшырылыуы ла улар өсөн көтөлмәгән бүләк булды. Бәхетлеләр ҙә үҙҙәренең табель һандары буйынса махсус программа ярҙамында осраҡлы һайланды.

15 июлдә “Металлург” стадионында ҡатнаш эстафета үтә. Комбинат спортсылары төрлө дистанцияларға йүгереүҙә, велосипедта уҙышыуҙа, сәпкә туп ырғытыуҙа көстәрен һынаясаҡ. Шул уҡ көндө Металлургтар майҙанында комбинат эшселәренә тантаналы шарттарҙа Башҡортостан Республикаһының, Белорет районының, район хакимиәте башлығының Почет грамоталарын һәм “Башҡортостандың алдынғы металлургы” исеме тапшырыла.

Кисен белореттарҙы байрам концерты көтә. Унда Иҙел башының, Силәбенең ижади коллективтары, Krukov Band Рәсәй төркөмө сығыш яһай.