Һағындыра шул осор

Хѳрмәтле милләттәштәр! Бѳйѳк Октябрь байрамы етте. Әйҙәгеҙ, ошо бѳйѳк байрамды кѳтѳп алғаныбыҙҙы, нисек матур итеп үткәргәнебеҙҙе иҫләп, хәтирәләргә бирелеп алайыҡ. Һеҙ һағынаһығыҙмы шул ваҡыттарҙы?
Алдымда  "Урал" гәзитенең  1965, 1975, 1985 йылдар тѳпләнмәләре. Гәзиттең  Октябрь байрамына арналған һандары.  Ул ваҡытта Октябрь байрамы бар илебеҙ халҡы ѳсѳн иң матур байрамдарҙың береһе ине. 1965 йылдың 6 ноябрҙә сыҡҡан 133-сѳ һандың 1-се бите. КПСС райкомы, Райсовет Башҡарма комитеты халыҡты Бѳйѳк Октябрь социалистик революцияһының 48 йыллығы менән ҡотлай. 
"Районыбыҙҙың ауылдары һәм поселоктары байрамға биҙәлгән. Бѳтә ерҙә лә хеҙмәтсәндәр байрам алдынан тырышып эшләне, бѳгѳн улар үҙҙәренең хеҙмәт уңыштары тураһында рапорт бирәләр", тиелгән мәҡәләлә.  Гәзиттең 2-се һәм  3-сѳ биттәрендә лә Бѳйѳк Октябрь байрамына  арналған мәҡәләләр. 
"Урал"дың  11 ноябрь һаны ла ҡалала үткән  демонстрация тураһында. 
1975 йыл. Гәзитебеҙҙең 6 ноябрь һаны. Байрам менән ҡотлау.  "Октябргә хеҙмәт рапорттары" - мәҡәлә. Гәзит тулыһынса хеҙмәт коллективтары уңышы, хеҙмәт алдынғылары тураһында мәҡәләләр менән тулы. 11 ноябрҙә сыҡҡан гәзиттә лә район-ҡалала үткән байрамдар, Металлургтар майҙанындағы демонстрациянан фотолар бирелгән. 
1985 йыл. 7 ноябрь, 134-се һан. КПСС райкомы, райсовет Башҡарма комитетының район хеҙмәтсәндәрен  байрам менән ҡотлауы.  Йәшәһен Бѳйѳк Октябрь социалистик революцияһының 68 йыллығы! "Урал"дың  11 ноябрҙә сыҡҡан  135-се һанының беренсе битен районда үткән демонстрация, шат йѳҙлѳ кешеләрҙең йѳҙҙәре һүрәтләнгән. 
Һағындығыҙмы шул осорҙо? Һағынһағыҙ, хәтирәләрегеҙ менән уртаҡлашығыҙ. 
Байрам менән һеҙҙе, ҡәҙерле гәзит уҡыусыларыбыҙ!