Янғындарҙы иҫкәреү - ярты бәлә

Көндәлек тормоштағы янғындарҙы иҫкәртеү ут, янар материалдар һәм техника менән һаҡ эш итеүҙе, шулай уҡ янғындар һанын кәметеү һәм граждандарға хәүефһеҙлек ҡағиҙәләре тураһында мәғлүмәт биреү маҡсатында халыҡ араһында янғынға ҡаршы сараларҙы пропагандалауҙы күҙ уңында тота.

Үткәрелгән саралар барышында граждандар менән электр һәм газ ҡорамалдарын файҙаланғанда янғын хәүефһеҙлеге ҡағиҙәләрен үтәү, ут менән һаҡһыҙ эш итеү һәм асыҡ территорияларҙа ҡоро үлән үҫемлектәрен һәм сүп-сарҙы яндырыу өсөн административ яуаплылыҡ тураһында әңгәмәләр алып барыла. Шулай уҡ янғын хәүефһеҙлеге ҡағиҙәләре менән генә таныштырыуҙан тыш, ашығыс хеҙмәттәрҙең телефон номерҙары һәм янғын һүндереүселәргә шылтыратыу ысулдары менән иҫтәлектәр тапшырыла.

Статистика мәғлүмәттәре буйынса, уҙған осорҙа Республика биләмәһендә 8423 янғын теркәлгән, уларҙа 185 кеше һәләк булған. Белорет районында хәл айырыуса ҡатмарлаша  - ошо уҡ осорҙа 309 янғын теркәлде һәм уларҙа 15 кешенең ғүмере ҡыйылды.

Һауа температураһының түбәнәйеүе сәбәпле, электр приборҙарын һәм йылытыу ҡорамалдарын ҡулланыу арта һәм уларҙы дөрөҫ файҙаланмау арҡаһында янғындар арта. Тап ошо осорҙа халыҡҡа янғын хәүефһеҙлеге ҡағиҙәләрен хәтергә төшөрөү һәм иҫкәртеү саралары уҙғарыу мөһим. Ошоно иҫәпкә алып, 4 декабрҙә ҡалала “Урал аръяғы” янғынға ҡаршы отряды, ҡаланың янғындарҙы иҫкәртеү хеҙмәте үҙәге инструкторҙары, шулай уҡ урындағы хакимиәт вәкилдәре менән пландан тыш рейд үткәрелде.

Рейд барышында иғтибар күп фатирлы, күп ҡатлы ағас йорттарға  йүнәлтелде, уларҙа конструкцияһы һәм йыш ҡына иҫке электр үткәргестәре, боҙолған йылытыу системалары булыуы арҡаһында янғын хәүефе ҙур. Рейд барышында тиҫтәләгән торлаҡ биналар тикшерелде. Янғын хәүефһеҙлеге сараларын үтәү айырыуса  ентекле тикшерелде. Инспекторҙар электр сымдарының төҙөк булыуына иғтибар итте. Рейд ваҡытында күп һанлы ҡағиҙә боҙоуҙар асыҡланды:

 - бер нисә фатирҙа янғын сығыу хәүефе тыуҙырған туҙған электр сымы табылды;

 - ҡайһы бер йорттарҙа углекислый газ менән ағыуланыу һәм янғын сығыу хәүефе тыуҙырған мейес мөрйәләре асыҡланды;

- күп фатирҙарҙа янғын иҫкәрткестәр (АДПИ) юҡ. Янғын иҫкәрткестәр - янғынды ваҡытында асыҡлауҙы тәьмин итеүсе һәм тиҙ арала эвакуация сараларын күрергә мөмкинлек биргән бик мөһим ҡоролма. Уларҙың юҡлығы йәки эшләмәүе янғындан ҡотолоу мөмкинлеген һиҙелерлек кәметә.

Иң етди янғын хәүефһеҙлеге ҡағиҙәләрен боҙоуҙар асыҡланған фатирҙарға айырыуса иғтибар бүленде. Бынан тыш, йорт буйынса өлкән һәм урам комитеты менән әңгәмә үткәрелде, унда асыҡланған проблемалар һәм уларҙы хәл итеү юлдары ҡаралды. Шуныһы мөһим, рейд ваҡытында фатирҙарҙың береһендә газ сығып тороуы асыҡланды. Был хаҡта шунда уҡ авария хеҙмәтенә хәбәр ителде. Был осраҡ хәүефһеҙлекте тәьмин итеүгә комплекслы ҡарауҙың мөһимлеген билдәләй, ул янғын хәүефһеҙлеген генә түгел, газ хәүефһеҙлеген дә үҙ эсенә ала. Дөйөм тырышлыҡ менән генә ҡалабыҙҙы хәүефһеҙерәк итә аласаҡбыҙ.

Янғын сыҡҡан осраҡта шунда уҡ 112 йәки 101 телефондары буйынса ашығыс хеҙмәттәр саҡырығыҙ, кешеләрҙе һәм мөлкәтте ҡотҡарыу өсөн мөмкин булған бөтә сараларҙы күрегеҙ. Янғын хәүефһеҙлеге ҡағиҙәләрен үтәгеҙ! Үҙегеҙҙе һәм яҡындарығыҙҙы һаҡлағыҙ!

Наил ФӘТҠУЛЛИН, Башҡортостан Республикаһы Ғәҙәттән тыш хәлдәр буйынса Дәүләт комитетының Белорет ҡалаһындағы янғындарҙы иҫкәртеү төркөмө инструкторы.