"Сауҙала үҙ урыныбыҙҙы таптыҡ"

- Мәктәптә уҡығанда уҡ сәнғәт мәктәбенә тегеү түңәрәгенә йѳрѳнѳм. Шул ваҡытта әсәйемдең кейелмәгән кейемдәренән үҙемә яраҡлы, заманса итеп матур әйберҙәр тегеп кейер инем. Тап шул осорҙа атайым мәрхүм булып ҡалды. Ә һуңынан 17-се гимназияны тамамлағас, металлургия институтының киске бүлегенә уҡырға индем. Әсәйемә лә ярҙам булыр, үҙемде лә ҡарармын, тип баҙарға һатыусы булып эшкә тѳштѳм. Һатыу иткәндә кешеләрҙе күҙәтеп, ошо кейем һеҙгә бик килешер ине, тип тәҡдим итәм. Ысынлап та, кейемдәрҙе оҡшатып һатып алырҙар ине. Был эш минең үҙемә лә бик оҡшап китте, кѳндән-кѳн үҙенә нығыраҡ ылыҡтырҙы. Кѳндѳҙ эшҡыуарҙарға ялланып әйберҙәр һатам, кискеһен уҡырға йѳрѳйѳм. Үҙемдең һатыу нѳктәһен асыу хыялы кѳндән-кѳн үҫә барҙы. Һатыу эшендә бер аҙ тәжрибә туплағас, үҙемә ышаныс та артты. Ул ваҡытта матур кейемдәр булманы тиерлек. Һәр нәмә дефицит ине. Сауҙа ла икенсе, талаптар ҙа улай ҡаты булманы. Хәҙер был эшкә тотоноуы, башлап ебәреүе бик ауыр. Сауҙа эшенә, һатыу итергә үҙ теләгем менән килдем. 2003 йылдың 11 мартында бәләкәй генә беренсе сауҙа нѳктәһен асып ебәреүгә ирештем, уны "Сабрина" тип ѳлкән ҡыҙымдың исеме менән атаным. Әммә Үҙәк баҙарҙа оҙаҡ эшләргә тура килмәне, үҙгәртеп ҡороу эштәре башланды, һатыу нѳктәләре ябылды, яңы хужалар яңы бина тѳҙѳргә ҡарар итте. "Аструм" сауҙа үҙәге асылғас, беҙ киренән заманса тѳҙѳлгән бинаға ҡайттыҡ. Әлбиттә, тәүге мәлдә бер генә бүлек ине, тырыша торғас, ассортимент та киңәйҙе, был иһә артабан үҫергә ынтылыш бирҙе. Беҙҙең тауарҙарҙы оҡшатҡан клиенттар күбәйҙе. Бигерәк тә йәштәр ярата беҙҙә кейенергә. Яңы бинала "SaBeLL" тип яңы исем һайланыҡ. Ике ҡыҙымдың Сабрина һәм Эллинаның исемдәрен берләштерҙек. Сауҙа эшендәге уңышым ѳсѳн ағайым Надир Ҡадир улына бик рәхмәтлемен. Әсәйем Йәнифә Хәлфетдин ҡыҙы һәр саҡ балаларҙы ҡарап торҙо. Уңышлы эшләп китеүемдә уларҙың ярҙамы күп булды. Шулай уҡ тормош иптәшем Руслан Фират улы янымда һәр саҡ терәк булып тора. Бергәләп тауар һатып алырға йөрөйбөҙ. Бына 20 йыл инде икәүләшеп оҙон юлдар үтәбеҙ. Тауарҙы Мәскәүҙән килтерәбеҙ. Һәр тауарҙы ентекләп ҡарап, һайлап алам. Шунда уҡ аксессуарҙар ҙа ҡарайым. Клиенттарыбыҙға кейемдәрҙән тыш шапкалар, шарфтар, сумкалар, бирсәткәләр тәҡдим итәбеҙ. Беҙҙең бүлектәрҙә тулыһынса зауыҡлы кейенергә мѳмкин. Әлбиттә, сауҙа эше еңел бирелмәне, төрлө хәлдәргә юлыҡтыҡ, алданған, таланған, юлда аварияға осраған мәлдәребеҙ ҙә булды. Әммә бер ваҡытта ла сауҙаны ташларға тигән уй килмәне. Эшемде бик яратам. Кешеләр менән аралашыуы, ҡатын-ҡыҙҙарҙы зауыҡлы, килешле итеп кейендереүе оҡшай. Бының өсөн беҙҙең сауҙа бүлектәрендә барыһы ла бар. Иң мѳһиме, ҡаланың сауҙа эшендә, ошо юлды һайлаған эшҡыуарҙар араһында беҙ ҙә үҙ урыныбыҙҙы таптыҡ. Үҙемдә эшләгән коллегаларымдан да уңдым. Мария Бунина, Юлия Пирогова, Наиля Ғайсина, Людмила Губина, Валентина Чикунова - сауҙа эшен яҡшы белгән тырыш хеҙмәткәрҙәр.