Мөһим бурыс - таҙа һыу!

Ноябрь һәм декабрь дауамында ауыл ойошмаларында һәм учреждениеларында алдан йыйылыштар һәм халыҡ араһында һорау алыуҙар үткәрелде. Инициативалы бюджетлау программаһына ярҙам итеү өсөн төрлө спорт һәм мәҙәни саралар ойошторолдо: концерттар, конкурстар, уйындар. Алдан йыйылыштарҙа һайланған инициативалы төркөм ауылдаштары араһында аңлатыу эшен әүҙем алып барҙы, документация әҙерләне.

Программала ҡатнашыу өсөн бер нисә проект тәҡдим ителде, мәҫәлән, насос станцияһы бинаһының ҡоймаһын ремонтлау, балалар майҙансығы һатып алыу һәм ҡуйыу, ауыл стадионын яҡтыртыу. Иң актуаль проблема булып насос станцияһы ҡоймаһын ремонтлау тора. Һыу менән тәьмин итеү халыҡтың йәшәйешен уңайлы итәсәк һәм мөһим мәсьәлә булып тора. Ул йорттарға һәм учреждениеларға даими һыу ағымын тәьмин итә, шулай уҡ һыу менән тәьмин итеү системаһында кәрәкле баҫымды һаҡларға мөмкинлек бирә. Биләмәгә хайуандар инмәһен өсөн яңы ҡойма ҡуйырға ҡарар ителде, әммә был ҙур сумма талап итә.

Әлеге ваҡытта насос станцияһы бинаһы һәм артезиан скважинаһы биләмәһе тирәләй яңы ҡойма төҙөү өсөн 1 млн. 200 мең һумлыҡ смета бар. Был программала бер нисә тапҡыр ҡатнашҡан ауыл халҡы, әгәр бөтәһе лә берләшеп, конкурстың бөтә шарттарын үтәргә тырышһа, мотлаҡ еңеп сығырын һәм проектты тормошҡа ашырыу өсөн аҡса буласағын яҡшы аңлай. Шуға күрә Туҡан ауылында насос бинаһын ремонтлауҙы (ҡойманы төҙөкләндереүҙе) күпселек тауыш менән “Урындағы башланғыстарҙы хуплау”программаһына индерергә ҡарар ителде. Был проектты быйыл тормошҡа ашырыу мөмкин буласаҡ.

Әлфиә СӘМИҒУЛЛИНА,Туҡан ауыл хакимиәте башлығы.