Уяулыҡ бәләнән ҡотҡарған

Район буйынса эске эштәр бүлегенә мессенджерҙағы емерелгән аккаунт аша аҡса урларға маташыуҙары хаҡында апалы-һеңлеле ҡыҙҙар мөрәжәғәт итә.

Полиция мәғлүмәттәре буйынса, ҡыҙҙарҙың береһенә бер нисә сәғәткә 30 000 һум аҡса һорап биш секундлыҡ тауышлы хәбәр килгән. Тауыш һеңлеһенеке кеүек тойола, әммә ғәҙәттә ул бындай тауышлы хәбәр яҙҙырып ебәрмәй, кәрәк булғанда шылтырата.

Ул шикләнеп һеңлеһенә шылтырата һәм уның бер ниндәй ҙә хәбәр ебәрмәүе раҫлана. Мессенджерҙы тикшергәндә, аккаунтҡа инеү мөмкин түгеллеге асыҡлана: паролде тергеҙергә маташҡанда система кодтың зыян күреүсегә билдәһеҙ булған электрон почтаға ебәреләсәге тураһында хәбәр итә. Йәғни профилгә башҡа кешенең почтаһы бәйләнгән була.

Бынан тыш ҡыҙ «Дәүләт хеҙмәттәре» порталындағы шәхси кабинетына ла инә алмай. Кодты тергеҙеү өсөн ул Күп функциялы үҙәккә мөрәжәғәт итә. Пароль үҙгәртелгәндән һуң кабинетта рөхсәтһеҙ ғәмәлдәр табылмай.

Апалы-һеңлеле полицияға ғариза бирә. Был факт буйынса Рәсәй Енәйәт Кодексының 30-сы статьяһының 3-сө өлөшө, 159-сы статьяһының 2-се өлөшө, 272-се статьяның 2-се өлөшө буйынса енәйәт эше ҡуҙғатылған.

Евгения ЛИСОВСКАЯ, район буйынса эске эштәр бүлеге хеҙмәткәре.