Туҡан уҡыусылары - полиция музейында

Экскурсия балаларға эске эштәр органдары тарихы менән танышырға һәм төрлө йылдарҙа тәртип һаҡсылары булып эшләгән кешеләр тураһында белергә ярҙам итте.

Музей етәксеһе мәктәп уҡыусыларына полицияның барлыҡҡа килеүе һәм уның тәүге етәкселәре тураһында һөйләне, архив фотоларын күрһәтте. Тарихта исемдәре һаҡланып ҡалғандар араһында милицияның тәүге начальниктарынан береһе Алексей Пирожников. Балалар шулай уҡ 1959 йылда ойошторолған ирекле халыҡ дружинаһы тураһында белде һәм төрлө йылдарҙағы хеҙмәткәрҙәрҙең фотоларын ҡараны.

Полиция музейының беренсе етәксеһе Чумиковҡа тапшырылған символик асҡыс айырыуса ҡыҙыҡһыныу уятты. Экскурсовод уның эше һәм хеҙмәт тарихы тураһында хәтерҙе һаҡларға ярҙам иткән музей экспонаттары менән таныштырҙы.

Паспорт өҫтәле стендында уҡыусылар төрлө йылдарҙағы документтарҙы күреп, уларҙың ваҡыт менән нисек үҙгәреүен сағыштырҙы. Балалар шулай уҡ фотоһүрәттәр менән танышты һәм өс быуын Дәүләт Автоинспекцияһының номер билдәләрен ҡараны. Уҡыусыларҙың береһе киләсәктә инспектор булырға хыялланыуы хаҡында белдерҙе.

Экскурсия уҡыусылар өсөн иҫтә ҡалырлыҡ матур  ваҡиға булды. Фотоһүрәттәрҙе һәм документтарҙы ҡарап, улар полиция тарихына ҡағылды һәм уларҙың хеҙмәте тураһында күберәк белде. Бәлки, кемдер өсөн был осрашыу эске эштәр органдарының һөнәре һәм эше менән етди ҡыҙыҡһыныуҙың башланғысы булыр.

Евгения ЛИСОВСКАЯ, район буйынса эске эштәр бүлеге хеҙмәткәре.