Йәнә иҫерек булған

Район буйынса эске эштәр бүлегенең юл хәрәкәте Дәүләт автоинспекцияһы хеҙмәткәрҙәре иҫерек килеш автомобиль менән идара иткән кешене ҡулға алды.

Ирҙе алкоголь тестеры ярҙамында тикшергәндәр һәм һөҙөмтә  0,585 мг/л тәшкил итә.

Асыҡланыуынса, элек ул иҫерек килеш транспорт сараһы менән идара итеп, яуаплылыҡҡа тарттырылған булған. Шуға ҡарамаҫтан, ул алкоголь эскәндән һуң яңынан руль артына ултыра.

Эскән килеш машина йөрөтөү бөтә юл хәрәкәтендә ҡатнашыусыларҙың ғүмеренә һәм һаулығына хәүеф тыуҙыра.

Был факт буйынса Рәсәй Енәйәт кодексының 264.1 статьяһының 1-се өлөшө буйынса енәйәт эше ҡуҙғатылған.

Статья санкцияһы штраф, мотлаҡ йәки мәжбүри эштәргә йәлеп итеүҙе йәки иректән мәхрүм итеүҙе күҙ уңында тота. Бынан тыш, суд хөкөм ителгән кешене билдәле бер вазифа биләү йәки билдәле бер эшмәкәрлек менән шөғөлләнеү хоҡуғынан мәхрүм итә ала.

Дәүләт автоинспекцияһы иҫерек килеш автомобиль менән идара итеү етди хоҡуҡи эҙемтәләргә һәм фажиғәгә килтереүе хаҡында иҫкәртә. Әгәр алкоголь ҡулланһағыҙ, руль артына ултырмағыҙ - такси саҡыртығыҙ йәки айыҡ водителдән һеҙҙе өйгә алып ҡайтыуын һорағыҙ.

Евгения ЛИСОВСКАЯ, район буйынса эске эштәр бүлеге хеҙмәткәре.