Ҡаҙаныштарыбыҙ ҡышы

Сахалинда Халыҡ-ара олимпия комитеты күҙәтеүе һәм ЮНЕСКО яҡлауы аҫтында үткән “Азия балалары” Беренсе ҡышҡы уйындарына 20 илдән 1196 спортсы йыйылды. Ҡаҙағстан, Үзбәкстан, Төркмәнстан, Тажикстан, Ҡырғыҙстан, Әрмәнстан, Монголия, Непал, Корея Республикаһы, Таиланд, Гонконг, Иордания, Филиппины, Япония, Афғанстан, Берләшкән Ғәрәп Эмираттары, Һиндостан, Кувейт, Сирия йәш спортсылары менән берлектә Рәсәйҙең Сахалин өлкәһе, Яҡутия, Мәскәү, Татарстан, Башҡортостан, Себер, Урал һәм Алыҫ Көнсығыш федераль округтарынан барлығы 28 команда ҡатнашты. Йәш спортсылар 10 көн дауамында барған ҡышҡы уйындарҙа спорттың һигеҙ төрө - тау саңғыһы, сноуборд, биатлон, саңғы ярыштары, трамплиндан һикереү, фигуралы шыуыу, шорт-трек һәм хоккей буйынса ярышты. Йәмғеһе 93 миҙал комплекты уйнатылды. Көсөргәнешле ярыштарҙа Сахалин өлкәһенең йыйылма командаһы дөйөм миҙалдар иҫәбе буйынса өсөнсө урын яуланы. Утрау спортсылары иҫәбендә төрлө дәрәжәләге 26 миҙал. Беренсе позицияла Урал федераль округы командаһы урынлашһа, икенселә - Мәскәү командаһы.

“Азия балалары” ҡышҡы уйындарҙа 28 команда араһынан Башҡортостан спортсылары 11 баҫҡысты биләне. Делегацияның күпселек өлөшөн сноуборд буйынса спортсылар тәшкил итте. Нәҡ сноубордсылар Башҡортостандың миҙалдар һауытына төрлө дәрәжәләге ике миҙал өҫтәп, республиканы 11 баҫҡысҡа күтәрҙе. Параллель слаломда үҫмерҙәр араһынан Өфөнән Всеволод Мартынов Урал Федераль округы спортсыһы Ярослав Степанконан ғына ҡалышып, II урынға сыҡты. Команда слаломында, республика ҡыҙҙары араһында иң яҡшы һөҙөмтә күрһәткән, параллель слалом-гигантта пьедесталға бер генә аҙым ҡалған Эльвина Фазылова Всеволод Мартынов менән III урынды яуланы. Һөҙөмтәлә, Урал федераль округы командаһы - I, Сахалин өлкәһенең беренсе командаһы - II, Башҡортостан III урында. Всеволод Мартынов менән Башҡортостан данын күп илдәргә таратҡан шәп ҡыҙ - Эльвина Фазылова ҡайҙан тип уйлайһығыҙмы?! Эльвина Абҙаҡ тау саңғыһы һәм сноуборд мәктәбе тәрбиәләнеүсеһе. Улай ғына ла түгел, Башҡортостан сноубордсылары составында Абҙаҡтан Фәнзилиә Бикҡужина, Раушания Мөхәмәтова, Ләйсән Түрйәновалар ҙа ҡатнашты. Тырыш, маҡсаттарына табан барған ҡыҙҙарҙың ил кимәлендәге ошондай уңыштарға ирешеүе менән уларҙың тренерҙары ғына түгел, атаәсәләре, туғандары, уҡытыусылары, класташтары ла ғорурлана. Абҙаҡ ҡыҙҙарының халыҡ-ара уйындарҙа, төрлө кимәлдәге ярыштарҙа ҡатнашыуы тәүгә генә түгел, уларҙың Рәсәй, республика, район кимәлендә яуланған еңеүҙәре байтаҡ. Әйҙәгеҙ, команда слаломында бронза миҙал яулаған ҡыҙ - Эльвина ФАЗЫЛОВА (һүрәттә миҙалы менән) менән әңгәмә ҡорайыҡ.

- Сахалин, халыҡ-ара ҡышҡы уйындар миндә тик йылы тәьҫораттар ғына ҡалдырҙы. Тышта 32 градус һыуыҡ булыуға ҡарамаҫтан, беҙҙе, Башҡортостан делегацияһын, аэропортта уҡ ҡаршы алдылар, ҡала менән яҡындан таныштырҙылар. Уйындарҙа ҡатнашҡан спортсылар өсөн махсус төҙөлгән хостелдарҙа йәшәнек. Үҙебеҙҙең ярыштарҙан тыш, башҡа спорт төрҙәренә йөрөнөк. Беҙҙе музейҙарға алып йөрөнөләр, утрау тарихы менән танышыу форсаты ла тейҙе. Бынан тыш, төрлө интерактив майҙансыҡтар, мәҙәни парктар эшләне, оҫталыҡ дәрестәре үткәрелде. Уйындар ҙа ҙур ойошҡанлыҡ менән үтте. Башҡортостан да ярыштарҙа уңышлы позицияны биләне.

- Юҡ, айырылмай тиерлек. Ҡар ҙа беҙҙең Абҙаҡтыҡы кеүек. Еңеү өсөн бер ҡаршылыҡ та булманы.

- Мин Абҙаҡ мәктәбенең IX класында уҡыйым. Уҡыуҙан тыш, дүрт йыл сноуборд менән шөғөлләнәм. Тренерым Альберт Аслыянов был спорт төрөнә һөйөүемде нығыта ғына. Сноуборд менән шөғөлләнеү ныҡышмалыҡ, көс талап итә. Һәр спортсының физик әҙерлеге, характеры, үҙ-үҙенә ышаныу мөмкинлеге лә булырға тейеш. Шәхси тренерыбыҙ - Альберт Мингәрәй улы, ә халыҡ-ара уйындарҙа Башҡортостандың өлкән тренеры Наталья Викторовна Кизина булды. Атай-әсәйем, туғандарым да һуңғы уңыштарым менән ғорурлана, тағы ла юғары үрҙәргә күтәрелеүемде теләй. Ғаиләбеҙ менән спортты яратабыҙ. Ағайым Владислав та тау саңғыһы менән алты йыл шөғөлләнә. Ул сноуборд буйынса спорт мастерлығына кандидат. Дүрт йыл шөғөлләнеү осоронда Рәсәй, республика, район-ҡала ярыштарында ҡатнашырға өлгөрҙөм. Тиҫтерҙәрем менән аралашыу, улар менән сәмләшеп ярышыу тағы ла юғары уңыштарға ирешеү өсөн дәрт һәм көс бирә. Иптәш ҡыҙҙарым менән Красноярск, Ижевск, Куса, Өфө, Белорет ҡалаларында үткән ярыштарҙа ҡатнашып, ярайһы уҡ яҡшы һөҙөмтәләргә ирештек.

- Фәнзилиә ике көн дауамында - VII урындарҙы, Раушания - XII, XIII, Ләйсән иһә IV һәм VI урындарҙы яуланы. Күләмле уйындарҙа иптәштәремдең бындай һөҙөмтәләргә ирешеүе бик ҡыуаныслы. Еңеүҙәребеҙ алда һәм күп буласаҡ әле. Эйе, бер нисә көн эсендә башҡорт бейеүен өйрәнеп, тамашасы алдында башҡарҙыҡ, шулай итеп халҡыбыҙҙың бейеүе менән таныштырҙыҡ. Башҡорт кейемдәрен мәктәптән алдыҡ.