Бейеклек яулаусылар

Көнъяҡ Уралдың 1008 метрлыҡ бейеклектәге иң матур һырттарының береһе Ҡыраҡа һыртына Рәсәйҙең 10 төбәгенән (Башҡортостандан тыш Силәбе, Свердловск, Ырымбур һәм Мурманск өлкәләре, Пермь крайы, Удмуртия, Татарстан, Мәскәү һәм Санкт-Петербургтан) йүгеректәр йыйылды. Ә Кипрҙан килгән спортсы ярышҡа халыҡ-ара статусы бирҙе.

Беҙҙең райондан Белорет, Сермән, Шығай, Үткәл, Үҙәнбаш йүгеректәре көс һынашты. Спортсыларҙың күбеһе ғаиләләре, балалары менән ҡатнашты. Шуныһы ҡауаныслы, ғаилә йүгереүендә белореттар Анжелика һәм Андрей Мельниковтар беренсе булһа, ә уҡыусылар араһында Шығайҙан Илсен Нурмөхәмәтов иң яҡшыһы тип танылды.

- Мин бындай ярыштарҙа дүртенсе тапҡыр ҡатнашам, - ти Сермән ауылынан Ренат Мырҙабаев. - Башҡаларға ла ҡатнашырға һәм сәләмәт тормош алып барырға кәңәш итәм. Был сараны, традиция буйынса, Магнитогорск спортсылары ойоштора, ә Шығай ауыл хакимиәте уларға ярҙам итергә тырыша. Әйткәндәй, Kraka race - Белорет районында үткәрелгән беренсе тау уҙышы. Сентябрь башында йүгеректәр Ҡыраҡа һырттары буйлап ярышһа, ай аҙағында 46 саҡрымлыҡ алыҫлыҡтағы Ирәмәл тауына тиклем йүгереп көс һынашасаҡ.