Октябрьский биҫтәһен үҙгәрештәр көтә

Һуңғы йылдарҙа район һәм ҡалала тѳҙѳкләндереү эштәренә ҙур иғтибар бүленә. Ҡала эсендәге урамдарҙа, юлдарҙа, йорт алдарында яһалған капиталь ремонт эштәре быға асыҡ дәлил булып тора. Урамдарға йәмһеҙ тѳҫ биреп ултырған тимер гараждар, киоскылар ҙа һүтеп алына. Иҫке һәм хужаһыҙ, йә булмаһа законһыҙ рәүештә ҡуйылған ҡоролмаларҙы демонтажлау буйынса ҡала хакимиәте һәм тѳҙѳкләндереү бүлеге тарафынан айырым ҙур эш алып барыла. Объект хужаларына алдан белдереүҙәр ебәрелә, аңлатыу эше үткәрелә. Хужалар был иҫкәртеүҙәргә битараф ҡалған осраҡта, объекттар һүтеп алына һәм махсус урынға сығарыла. Декабрь баштарына ҡалала законһыҙ ҡуйылған бер генә киоск, гараж да ҡалмаҫ, тип кѳтѳлә. Етәкселәр иғтибарынан ҡала яны биҫтәләре лә ситтә ҡалмай. Был йүнәлештә һәр биҫтә буйынса айырым үҫеш стратегияһы булдырылған. Ошо кѳндәрҙә тиҙҙән Октябрьский биҫтәһендә башланасаҡ реконструкция эштәре менән муниципаль район хакимиәте башлығы Владислав Геннадьевич Миронов таныштырҙы.

Оло ѳйгә ни кәрәк, кесеһенә шул кәрәк тигән кеүек, Октябрьский биҫтәһе әллә ни ҙур булмаһа ла хәл итәһе проблемалары етерлек. Әлеге ваҡытта 8-се мәктәп бинаһының киләсәге кѳнүҙәк мәсьәләләрҙең береһе булып тора. Бында мәктәп ҡыйығын алыштырғандан һуң беренсе һәм икенсе ҡат арауығында проблема килеп сыҡҡайны. Шул сәбәпле, был учреждениела белем биреүҙе туҡтатып, балаларҙы 18-се мәктәпкә һәм “Ровесник” клубына күсереп торорға мәжбүр булдылар. Хәлде тиҙ арала яйлау ѳсѳн мәғариф идаралығы һәм муниципаль район хакимиәте тарафынан барлыҡ саралар ҙа күрелә. Мәктәптең реконструкция проекты буйынса аукцион иғланителгән. Эш уңышлы тормошҡа ашырылған осраҡта мәктәптә уҡыу урындарын арттырыуға ла мѳмкинлек буласаҡ. Проектлау эштәре киләһе йылдың яҙына тамамланыр тип кѳтѳлә. Артабан етәкселәр мәктәпте реконструкциялау буйынса финанс ярҙамы һорап, Республика Хѳкүмәтенә мѳрәжәғәт итәсәктәр.

Биҫтәлә яҡын араларҙа хәл ителер-гә тейеш мәсьәләләрҙең икенсеһе - оҙаҡ йылдар ташландыҡ хәлдә торған элекке “Октябрь” кинотеатрын (һүрәттә) реконструкциялау. Әле был бинаны нимә эшләтергә кәрәклеге аныҡ ҡына хәл ителмәгән, был йәһәттән иҫке бинаға яңы һулыш биреү ѳсѳн тѳрлѳ фекерҙәр, тәҡдимдәр тикшерелә. Кинотеатрҙың артабанғы яҙмышын хәл итеү ѳсѳн республиканан финанс ярҙамы һорап мѳрәжәғәт иткәндәр ҙә инде. Әлеге ваҡытта биҫтәлә йәшәгән йәштәр һәм балалар ѳсѳн спорт менән шѳғѳлләнеүгә махсус урындарҙың булмауын иҫәпкә алып, был урында “Металлург” стадионында тѳҙѳлѳп ятҡан комплексҡа оҡшаш физкультура-һауыҡтырыу комплексы ла булыуы ихтимал. Яңы спорт ҡоролмаһы янындағы территория ла тѳҙѳкләндереләсәк һәм тейешле инфраструктура булдырыласаҡ. Тәү сиратта, әлеге ваҡытта ошо тирәлә теҙелеп киткән иҫке киоскылар һүтеп алынасаҡ. Был киоскыларҙың ҡасан ҡуйылғаны ла билдәһеҙ, үҙҙәренең йәмһеҙ, иҫке тѳҫѳ менән улар биләмә халҡына 90-сы йылдарҙы хәтерләтеп торғандай.

Октябрьский биҫтәһендә йәшәүселәр үҙҙәре лә тиҙҙән башланасаҡ ҙур эштәрҙе түҙемһеҙләнеп кѳтә. Улар муниципаль район хакимиәте башлығына үҙҙәрен борсоған дѳйѳм проблемаларҙы ла еткерҙе һәм тирә-яҡты сүп-сар менән бысратҡан кешеләргә ҡатыраҡ саралар күрелһен ине, тигән теләк тә белдерҙе.

Читайте нас