Киләсәк тәүәккәлдәр ҡулында

► Хәйерле сәғәттә, Азат Риф улы, иң элек “Урал спорт инвентарҙа­ры заводы”ның хәл-торошо менән таныштырып үтһәгеҙсе...

- Бөгөн үҙебеҙҙе хаҡлы рәүештә ма­шиналар эшләү предприятиеһы тип әйтә алабыҙ. Завод фитнес клубтар, тренажер залдары, урам спорт май­ҙансыҡтары, дауалау физкультураһы һәм мөмкинлектәре сикләнгәндәр өсөн спорт ҡорамалдары етештереү буйынса алдынғылар рәтендә. Бер үк мәлдә дәүләт һатып алыуҙарында ла әүҙем ҡатнашып, дилерлыҡ селтәрен киңәйтәбеҙ.

Уҙған йылда ҡалала өҫтәмә цех-фи­лиал асыуға ирештек. Ул иһә яҡын киләсәктә йүгереү юлы ҡорамалда­рын етештереү предприятиеһына әй­ләнәсәк.

Йыл башында завод 250 тонналыҡ вулканизациялы пресс, өс күсәр­ле торба бөгөү, шымартыу, ҡырыу, дорнлы профиль бөгөү һәм башҡа станоктар менән тәьмин ителде. Ҡо­рамалдар үткән йылдағы табыш һәм шулай уҡ ҡала хакимиәтенең ижти­мағи йәһәттән мөһим предприятие­ларға аҡсалата ярҙам күрһәтеү иҫә­бенә һатып алынды.

Әйткәндәй, дорнлы профиль бөгөү станогы етештерелгән продукция­ның сифатын яҡшыртырға, ҡорос профилде матур итеп бөгөргә мөм­кинлек бирәсәк. Был ҡиммәтле ҡора­малды заводҡа нигеҙ һалған саҡта уҡ һатып алырға ниәтләгән инек тә, ҡа­пыл-ҡара килеп сыҡманы. Оҙаҡ ҡына һайланғандан һуң, төрөк фирмаһы етештергән станокта туҡталдыҡ, март айында ул беҙгә килеп етте. Бынан ары заводтың көнәркәшлек һәләте тағы ла артыр, тип ышанабыҙ.

► Һеҙҙеңсә, төбәктә эшҡыуар­лыҡҡа етерлек иғтибар бүленәме?

- Ошо йылдан беҙҙең ойошма Башҡортостан Республикаһы Тор­лаҡ-коммуналь хужалыҡ министр­лығының мөһим тәьмин итеүсе предприятиелары исемлегенә ин­дерелде. Шуны билдәләү зарур: төбәк Башлығы профилле министр­лыҡтарға урындағы етештереүселәр­гә илтифат күрһәтергә кәңәш бирҙе. Был бик яҡшы тенденция, минеңсә. Завод Рәсәй баҙарында етди “уйынсы” һаналһа ла, федераль “монстр”ҙар кимәленә етеңкерәмәй. Радий Хә­бировтың кәңәше бик ҡулай булды - Башҡортостандың төрлө тарафта­рынан байтаҡ һорауҙар яуҙы. Был иһә төбәк баҙарында заказдарҙың ар­тыуына һәм предприятиеның позицияһы нығыныуға үҙ өлөшөн ин­дерәсәк.

► Пандемия илебеҙҙең бихисап предприятиеларын көрсөккә терәне...

- Эпидемиологик шарттарҙа ҡабул ителгән сикләү саралары, әлбиттә, эҙемтәһеҙ үтмәне. Бәғзе берәүҙәр ал­дан түләнгән заказдарынан баш тар­тырға мәжбүр булды, байтаҡ ҡына эшлекле тәҡдимдәр ғәмәлгә ашмай ҡалды. Шулай ҙа ышаныслы партнерҙарыбыҙ заводты тейешле заказ­дар күләме менән тәьмин итте. Бынан тыш, дәүләт заказдары менән эшләү ҙә иңгә өҫтәмә йөкләмәләр һала. Ике аҙна тын торғандан һуң, Сәнәғәт һәм энергетика министрлығының рөхсәте менән 12 апрелдән предприятие эшкә тотондо. Һис шикһеҙ, юғары әҙер­лек режимында эшләү зарури бойо­роҡтарҙы теүәл үтәүҙе аңғарта. Бит­лектәргә ҡытлыҡты үҙебеҙҙең тегеү участкаһы көсө менән хәл иттек.

Ғөмүмән, һәр көрсөк яңы юл­дар эҙләү өсөн шәп мөмкинлек тә, мәҫәлән, һатып алынған ярымфабрикаттар исемлеген барлап, ҡайһы берҙәрен үҙебеҙҙә етештерә алабыҙ тигән фекергә килдек. Был йәһәттән рационалләштереүсе хеҙмәткәребеҙ, токарь Евгений Бузориндың тәҡдиме ҡулай булды.

► Тағы ниндәй пландар менән янаһығыҙ?

- Алдағы көндәргә уй-ниәттәр хәтһеҙ генә. Шуларҙың береһе - йыл ярым элек башланған йүгереү юлы ҡорамалдарын етештереүҙе яйға һа­лыу. Был уникаль бизнес-проект етди иғтибарға лайыҡ. Ә бит хатта спорт ҡорамалдарын етештергән ҡеүәтле предприятиелар ҙа йүгереү юлы аппа­раттарын сығарыуға тотонмай. Сөнки ул ҙур көс һәм финанс йәһәттән бай­таҡ сығымдар талап итә. Мин дә уны баштан уҡ тейешенсә баһалап етмә­гәнмен...

Йорт алды майҙансыҡтарына башҡорт тирмәһе рәүешендә түбәлек­тәр эшләү проекты ла уңышлы бул­маҡсы: ул ихаталарҙы төҙөкләнде­реү йәһәтенән (ҡомлоҡтарға түбәлек йәки ял итеү зонаһы) айырыуса ҡу­лай. Быйыл март айында үткән Тор­лаҡ-коммуналь хужалығы форумын­да Башҡортостан Республикаһының торлаҡ-коммуналь хужалығы министры Б.В. Беляев һәм төбәк ҡалалары үҫеше институты вәкилдәре ҡатна­шлығындағы пленар ултырышта ошо проектты күрһәттем. Был идея етәксе­гә ифрат оҡшаны, сөнки әлеге ҡорол­ма эҫелектән, ямғырҙан һаҡлап ҡына ҡалмаясаҡ, ә урам балалар комплекстарын тулыландырып, төбәктең милли үҙенсәлегенә баҫым яһаясаҡ.

► Фәһемле әңгәмәгеҙ өсөн ҙур рәх­мәт Һеҙгә, Азат Риф улы! Бынан ары ла изге ниәт-маҡсаттарығыҙ бойомға ашып торһон!