“Театр - тормош ул...”

► Азат, һинең йырҙарыңды, спектаклдәрҙә уйнауыңды тамашасы яратып өлгөргән. Йырҙарыңды тыңларға, актерлыҡ һәләтеңде ҡат-ҡат ҡарар өсөн театрға йөрөгәндәрҙе беләм. Бер нисә йыл элек, «Ғәлиәбаныу» спектакле башланыр алдынан, фойела ике ҡатын һөйләшеп торғанына шаһит булғайным. «Йәш саҡтарҙа атаҡлы артистар Фидан менән Нурияны күрер, йырҙарын тыңлар өсөн Өфөлә театрҙа күп йөрөнөк, әйкәйем.Үҙебеҙҙең биләриттәр ҙә уларҙан һис кенә лә ҡалышмай ҙаһа.Ҡараған һайын ҡарағы килә, ялҡытмай», - ти береһе. «Шулай шул, бынау Хәлил менән Ғәлиәбаныу үҙәккә үткәреп йырлайҙар», - тип ҡушыла икенсеһе. Һинең һәм партнерың Гөлнара Бәшәрова хаҡында ине был маҡтау һүҙҙәре.
Тимәк, һинең үҙ тамашасың булып өлгөргән, яраталар. Әйткәндәй, сәхнәгә тәү аяҡ баҫҡан саҡтарың нисегерәк булды?
- Шул тиклем үк маҡтап ебәрмәгеҙ әле (көлә). Башҡаларҙыҡы кеүек үк беҙҙең ғаиләбеҙҙә лә йырламаған, бейемәгән кеше юҡ ине. Әсәйем дә, атайым да уҡытыусылар, йыр-моңға ғашиҡ кешеләр. Уларға эйәргәнмендер. Мин, иң бәләкәсе булараҡ, иркә үҫтем, минән өлкән туғандарым, ҡыҙыҡ күреп, йырлатҡандарҙыр, тием. Беренсе класта уҡығанда тәүгә сәхнәгә сығып баҫтым. Геүләтеп ҡул саптылар. Шунан башлап сәхнәгә һөйөү уянғандыр ҙа, бәлки. Үҙемде ихласлап тыңлап, йырыма ҡул сапҡан саҡтары, һәммәһенең дә ҡәнәғәт, шат йөҙҙәре күҙ алдымдан китмәй.
Мәктәптә һәр сарала ҡатнашып, алда йөрөнөм, гармунда уйнарға өйрәнеп алдым. Урта мәктәптән һуң Стәрлетамаҡ мәҙәниәт техникумының театр бүлегенә уҡырға индем. Унда инде, билдәле, сәхнәлә йөҙөп йөрөп уйнарға өйрәтәләр.

► Тимәк, һин бәләкәйҙән артист булырға хыялландың?
- Шулайҙыр, үҙемде сәхнәнән баш-ҡа икенсе ерҙә күҙ алдыма ла килтермәнем. Бәләкәйҙән йырсы булам тип хыялландым.

Азат тураһында тулыраҡ әңгәмәне гәзитебеҙҙең 5-се һанында (15.01.2021) уҡығыҙ.