Бер хеҙмәт юлы менән

Ҡануниәт талаптары буйынса

Династия башлығы Урал Закиров - беренсел профсоюз ойошмаһы рәйесенең юридик мәсьәләләр буйынса урынбаҫары. Ул Белорет металлургия комбинатына 43 йыл самаһы элек эшкә урынлаша. 2011 йылдан алып комбинат хеҙмәткәрҙәренең мәнфәғәтен, хеҙмәт бәхәстәре килеп тыуған осраҡта, яҡлай.

- 36-сы һөнәрселек училищеһында автослесарь һөнәренә уҡып сыҡтым. Практиканы комбинаттың автотранспорт цехында үттем һәм ҡулыма диплом алғас та шунда ҡалдым, - ти Урал Фәрхетдин улы тәүге хеҙмәт йылдарын хәтерләп. - Армиянан һуң йәнә комбинатҡа килдем. 1-се цехҡа сым һуҙыу ҡорамалдарын ремонтлау буйынса слесарь итеп ҡабул иттеләр. 1995 йылдан эҫе участкаларҙа термик ҡорамалдарҙы ремонтлау слесаре булдым.

Урал Закиров Хеҙмәт һәм социаль мөнәсәбәттәр академияһының "Юриспруденция" йүнәлеше буйынса бер йыл уҡығас, 1-се ҡорос иретеү цехының комитет рәйесе итеп һайлана. 2011 йылда профком рәйесе урынбаҫары була һәм бөгөнгәсә яуаплы вазифаны биләй.

- Мин хеҙмәт бәхәстәре буйынса комиссияла комбинат хеҙмәткәрҙәре мәнфәғәттәрен яҡлайым, уларҙың мөрәжәғәттәренә юридик ярҙам күрһәтеү менән шөғөлләнәм. Минеңсә, һәр мәсьәләне һәм проблеманы хәл итеүҙә иң мөһиме - ғәҙеллек.

Спорт та тормошомда һәр ваҡыт мөһим роль уйнай. Мәктәптә саңғы ярыштары, еңел атлетика менән шөғөлләндем, ярыштарҙа ҡатнаштым, армияла ла әүҙем булдым.1988 йылда цехтың физик культура ойоштороусыһы итеп тәғәйенләнеләр. Коллективта Андрей һәм Сергей Казармщиковтар, Евгений Паньков, Анатолий Шляпников, ЕленаАнтошкина, Мәсәғүт Фазлиәхмәтов,Александр Лавров, Ольга Воробьёва,Рәйес Шәйхитдинов кеүек һәләтлеспортсылар күп булды. 90-сы йылдар предприятие өсөн ауыр булыуға ҡарамаҫтан, беҙ уға тоғро ғына ҡалманыҡ, спорт мәҙәниәтен дә үҫтерҙек,комбинат спартакиадаларының бөтә төрҙәрендә лә ҡатнаштыҡ, ҡала эстафетаһында призлы урындар яуланыҡ.

Ышаныслы тыл

Ғаилә башлығының тормош иптәше Венера Закирова комбинатҡа 2017 йылда килә. Ул һыу менән тәьмин итеү цехында һыуҙы таҙартыу аппаратсыһы булып эшләй: һыуҙы бысраҡтан таҙартыуҙы күҙәтә, фильтрҙарҙы йыуыу менән шөғөлләнә. Шулай уҡ насос машинисы ла: ҡабул итеү камераларында һыу кимәлен контролдә тота, “Стан-150”гә һыу биреү өсөн насос ҡорамалдарының эшен көйләй.

- Ҡала ҡаҙанлығында эшләгәндән һуң комбинатҡа эшкә урынлаштым, - ти Венера Булат ҡыҙы. - Ул ваҡытҡа предприятиела күп йылдар ирем һәм улдарым эшләй ине. Шул ваҡыттан беҙҙе ғаилә бәйләнештәре генә түгел, ә бер предприятиела эшләү бәйләй.

Венера Закирова ғаиләнең нисек барлыҡҡа килеүе тураһында ла һөйләне.

- Йортобоҙға хәрби хеҙмәттән отпускыға ҡайтҡан ике туған ағайым Рим һәм уның дуҫы Урал килде, шулай танышып киттек тә инде, - тип хәтерләй ул. - Хаттар яҙышып торҙоҡ, осраштыҡ, ә 1986 йылда өйләнештек. 19 июлдә, Металлургтар көнө алдынан, бергә йәшәүҙең 38 йыллығын билдәләйбеҙ. 1987 йылда игеҙәктәребеҙ Руслан һәм Рөстәм тыуҙы. Улдарыбыҙ лайыҡлы кеше булып үҫте, улар өсөн бер ҡасан да ҡыҙарырға тура килмәүе менән ғорурланам.

Венера Булат ҡыҙына һәр ваҡыт спорт сәме ярҙам итә. Ул 26-сы һөнәрселек училищеһында уҡығанында волейбол менән шөғөлләнә. Әйткәндәй, ул унда сәскә үҫтереүсе-декоратор һөнәрен ала. Алған белеме баҡсасылыҡ менән шөғөлләнеүҙә ярҙам итә. Венера Булат ҡыҙы ғаиләһе һәм дуҫтары менән тәбиғәттә ял итергә, һәр ваҡыт ҡунаҡтарға үҙ ҡулдары менән әҙерләнгән төрлө тәмле ризыҡтар тәҡдим итергә ярата. Балалары менән аралашыуҙа Закировтар төрлө алымдар ҡуллана, улар бер-береһен тулыландыра. Урал Фәрхетдин улы уларҙы ҡаты тота, бәләкәйҙән хеҙмәт һәм спортҡа һөйөү тәрбиәләй. Венера Булат ҡыҙы улдарына уңыштарға өлгәшергә ярҙам итә.

Айырылғыһыҙ туғандар

2008 йылда Рөстәм менән Руслан Белорет металлургия колледжын тамамлағас, комбинатҡа сым һуҙыусы булып эшкә урынлаша. Хеҙмәт эшмәкәрлеге йылдарында үҙҙәрен грамоталы, яуаплы, дисциплиналы хеҙмәткәрҙәр итеп күрһәтәләр, “Һөнәре буйынса иң яҡшы”лар исемен дә йөрөтәләр.

- Атайым 1-се цехта эшләй, ә беҙ дауам итәбеҙ. Олатайымдың тимер сым һуҙыу станында эшләү бәхете тейҙе, - тип йылмая сым һуҙыусы Рөстәм. - Эшкә урынлашып, ике ай эшләгәндән һуң, беҙҙе армияға алдылар. Төньяҡ Кавказда хеҙмәт итеп, сержант дәрәжәһендә тыуған ҡалабыҙға ҡайттыҡ. Туған комбинатыбыҙҙа тергеҙелдек. Төп эшем - пружиналы сым, төрлө диаметрлы арҡан әҙерләү, мастер бурыстарын да башҡарам.

Бала саҡтан һалынған тәртип эштәрендә лә ярҙам итә. Йылдар дауамында тупланған тәжрибәһе Рөстәмгә юғары һөҙөмтәлелек менән төрлө продукция етештереү мөмкинлеген бирә. Руслан өлкән смена мастеры, кәрәк икән участка начальнигын да алмаштыра. Етәксе булараҡ, ул коллективында дуҫтарса мөхит булдырған, был эш бурыстарын аныҡ һәм ваҡытында хәл итергә булышлыҡ итә.

- Тоғро юлдашыбыҙ - спорт. Ағайым менән оҙаҡ йылдар футбол менән мауығабыҙ. Физкультура институтына уҡырға инергә лә уйлағайныҡ, атай-әсәйебеҙ, комбинат - ышаныслы эш урыны, тип уйыбыҙҙан ҡайтарҙы. Даими күнекмәләр физик форманы ғына һаҡлап ҡалмай, шулай уҡ ныҡышмалылыҡ тәрбиәләй, маҡсатҡа ынтылырға, планлаштырылған һөҙөмтәләргә өлгәшергә ярҙам итә, - тип билдәләй Руслан. - 2001 йылда республиканан 50-ләп ғаилә ҡатнашҡан “Атай, әсәй һәм мин - спорт ғаиләһе” конкурсында, 2014 йылда мини-футбол буйынса “Мегаволга” бөтә Рәсәй һәүәҫкәр турнирында еңеү яуланыҡ. Хәҙер балалар футбол командаһында тренер булып эшләйем, улым Данил да шунда шөғөлләнә. Бер нисә йылдан уның менән бер командала уйнармын тим. Быйылғы йылдың иң сағыу ваҡиғаларының береһе - комбинат командаһының Ижевскиҙа үткән мини-футбол буйынса “Мечел” дөйөм корпоратив турнирында еңеүе. Ағайым менән йыш ҡына бер командала уйнайбыҙ һәм был турнирҙа ла үҙебеҙҙе яҡшы уйынсы итеп күрһәттек. “Турнирҙың иң яҡшы уйынсыһы” исемен алыу бәхете тейҙе.

Русландың ҡыҙы Юлиә гимнастика менән шөғөлләнә, ә Рөстәмдең балалары - Камил һәм Камила - мәктәпкәсә йәштәге балалар, уларҙы ниндәй спорт төрө күберәк йәлеп итәсәге әлегә билдәләнмәгән.

 Игеҙәктәр әүҙем ял итеүҙе өҫтөн күрә. Һал менән ағырға, бәшмәк йыйырға ярата. Белем багажын тулыландырыуҙы дауам итеп, Халыҡ-ара иҡтисад һәм хоҡуҡ институтында уҡыйҙар. Төрлө сменаларҙа эшләһәләр ҙә, бер-береһе һәм ата-әсәһе менән йыш осрашырға тырышалар. Ғаилә традицияларын хөрмәт итеп, үткәндәрһеҙ киләсәк юҡ, тип иҫәпләйҙәр.

 Ремонт мастеры

Урал Закировтың туғаны Илгиз Шәрипов металлургтарҙың техник лицейында слесарь-ремонтсы һөнәрен ала.

- 1999 йылда, эшкә урынлашырға ваҡыт еткәс, тимер юл цехында күсмә составты ремонтлау буйынса слесарь булып хеҙмәт юлын башланым. Тепловоздарҙы, локомотивтарҙы ремонтлағанда ҡорамалдар ҡоролошона иғтибарлы булыу, һәр быуынды айырым тикшереү мөһим, эш процесына һәм алынған һөҙөмтәгә ҡыҙыҡһыныуҙан тыш, тырышлыҡ та кәрәк, - тип аңлата Илгиз Зариф улы. - Тәжрибә, әлбиттә, йылдар менән бергә килә. Уны алырға тепловоздарҙы ремонтлау буйынса мастер Александр Платонов, слесарҙәр Анатолий Серебров, Андрей Копьев ярҙам итә.

Илгиз Зариф улы күп йыллыҡ намыҫлы хеҙмәте өсөн бер нисә тапҡыр Почет грамоталары менән бүләкләнә. Ул, Закировтар ғаиләһе ағзалары кеүек үк, комбинат эстафетаһында әүҙем ҡатнаша, баскетбол, волейбол, футбол уйнай.

- Ижевскиҙа уйнағанда ҡустыларым Руслан менән Рөстәм өсөн янып көйҙөм. Афарин! Белорет металлургия командаһы ҡалабыҙҙы данланы! - ти Илгиз.

Закировтар династияһының айырылғыһыҙ һыҙаттары булып даими алға барыу, ҡуйылған бурыстарҙы хәл иткәндә дисциплина һәм яуаплылыҡ тора. Ғаилә ағзалары бер-береһенә иғтибарлы: бергәләп килеп тыуған проблемаларҙы хәл итәләр, бергәләп уңыштарға шатланалар. Маҡсаттар берҙәмлеге һәм шул уҡ ваҡытта һәр кемдең ҡараштарын хөрмәт итеү - династия бәйләнештәрен ныҡлы нығытҡан иң мөһим нәмә.

Надежда ТРУСКИНА.

Анна КУЛИКОВА фотоһы.