Тимер юл магистралдәре һағында

Был көндө Дим эксплуатация вагон депоһы Инйәр вагондар хеҙмәтләндереү пунктының тәжрибәле вагон тикшереүсе-ремонтлаусылары Зәбир Шәрәфетдинов менән Рәил Шәмсетдинов хаҡлы рәүештә үҙҙәренеке тип иҫәпләй. Уларҙың иңендә - Башҡортостан тимер юлының төбәк именлеге хаҡына тиҫтә йылдар буйына яҡшы хеҙмәт итеү. Уларҙың хеҙмәте йыш ҡына пассажирҙар өсөн күренмәй. Состав станцияны һанаулы минуттар эсендә генә үтеп китә, әммә тап ошо ҡыҫҡа мәлдәр бөтәһен дә хәл итә. Оҙон тотҡалы сүкеш, фонарь һәм йылдар буйына тупланған тәжрибәһе менән ҡоралланып, оҫта һәр вагондың букса узелын, арбаның, тормоз системаһының һәм автоэләктергестең  торошон баһаларға өлгөрөргә тейеш. Хатаның хаҡы график тотҡарлыҡтары менән генә түгел, ә поездар хәрәкәтенең хәүефһеҙлеге менән дә үлсәнә. Подшипниктың артыҡ йылыныуын йәки тәгәрмәс туғынының сатнаған урынын ваҡытында күреү етди аварияны булдырмаҫҡа ярҙам итә.
Хеҙмәтләндереү пунктының өлкән вагон тикшереүсе-ремонтлаусылары Зәбир Шәрәфетдинов һәм Рәил Шәмсетдинов һөнәренә төрлө юлдар менән килә, әммә үҙҙәренең тәғәйенләнешен тап ошо ҡатмарлы, юғары иғтибарҙы талап иткән хеҙмәттә таба. Улар үҙ юлын, өс тиҫтә йылдан ашыу,  күп операциялар ҡул менән башҡарылған, төп ҡоралдар - ҡолаҡ, һиҙемләү һәм үткер күҙ булған дәүерҙә башлай. Бөгөн, заманса зарарһыҙ күҙәтеү сараларын һәм автоматик диагностика комплекстарын индереүгә ҡарамаҫтан, кеше факторы хәл иткес булып ҡала. Тәжрибәле остаздар йәш белгестәрҙе ғәҙәти металл гөрөлдәүен хәүефлеһенән айырырға өйрәтә. Уларҙың иҫәбендә - йөҙләгән иҫкәртелгән брактар,  уяулығы арҡаһында тиҫтәләгән вагондар ваҡытында ағымдағы ремонтҡа киткән. Хеҙмәттәштәре уларҙы аҙ һүҙле, әммә яуаплы, тәжрибәле, ҡарыуһыҙ кешеләр тип атай. Уларға техник мәсьәләләр буйынса кәңәш кенә түгел, ә тормош зирәклеге өсөн дә киләләр. Машинист һәм слесарҙарҙың йәш быуынына ҡиммәтле тәжрибәһен тапшырған коллективтың ысын терәге улар. Ғүмеренең 33 йылын тимер юл хеҙмәтенә бағышлаған  Зәбир Заһир улы “Тимер юл транспортында 30 йыл яҡшы хеҙмәте өсөн” күкрәк билдәһе менән юҡҡа ғына билдәләнмәгәндер.
- Бөгөн бындай белгестәрҙе һирәк осратаһың. Уларҙа ниндәйҙер етешһеҙлектәрҙе күреү һәм һиҙемләү һәләте бар. Ҡорамалдар хата бирә алған урындарҙа, улар бер ҡасан да яңылышмай. Әммә иң мөһиме - уларҙың эшенә ҡарашы. Зәбир Заһир улы, Рәил Йәннатхан улы өсөн составтың хәүефһеҙлеге - намыҫ эше. Сменаны тап улар ҡабул итеүен белһәм, һәр ваҡыт тынысмын. Бындай кешеләр ярҙамында  пассажирҙар ташыу ышаныслылығын гарантиялай алабыҙ. Ғөмүмән, хеҙмәтләндереү пунктында үҙ эшен яҡшы белгән, һөнәрен яратҡандар ғына эшләй. Хатта Рәсәй тимер юлдарында эшләүсе ғаиләләр ҙә юҡ түгел, - ти участка начальнигы Самат Бәхтийәров.
Ҡасандыр Смоленск тимер юл транспорты, элемтә һәм сервис техникумын уңышлы тамамлаған Самат Салауат улы бөгөн ике тиҫтә йылдан ашыу Куйбышев тимер юлына ҡараған Инйәр хеҙмәтләндереү пунктында хеҙмәт йөгөн лайыҡлы тарта. Уның ҡулы аҫтында Дим депоһына ҡараған Белорет станцияһында - 11, Ҡарламанда - 13 һәм Инйәр участкаһында 24 тимер юл эшсеһе эшләй.
Үҙҙәренең һөнәри байрамында Дим эксплуатацион вагондар депоһына ҡараған Инйәр вагондар хеҙмәтләндереү пункты коллективы барлыҡ хеҙмәттәштәрен Тимер юлсылар көнө менән ҡотлай. Зәбир Шәрәфетдинов һәм Рәил Шәмсетдинов кеүек хеҙмәтсәндәрҙең исемдәре предприятиеның алтын фондын тәшкил итә. Ошондай оҫталар үҙ урындарында торған саҡта, илдең ҡорос пульсы тигеҙ һәм ышаныслы итеп тибәсәк.
Тимер юлға көслө ҡулдар, үткер күҙ һәм ҡайнар йөрәк кәрәк. Барлыҡ тимер юлсыларға ла ныҡлы һаулыҡ, рух ныҡлығы, тыныс эш сәғәттәре һәм тормош юлында йәшел семафор теләйбеҙ!

ҺҮРӘТТӘРҘӘ: (һулдан уңға) тимер юлсылар - Рәил Шәмсетдинов, Самат Бәхтийәров һәм Зәбир Шәрәфетдинов; эш мәлендә.