Ғаилә йылына старт бирелде

Сараға йыйылыусыларҙы мәртәбәле ҡунаҡтар - район хакимиәте башлығы урынбаҫары, финанс идаралығы начальнигы Ольга Берко, район мәҙәниәт идаралығы начальнигы Ольга Овчинникова, Сосновка ауыл хакимиәте башлығы Айгөл Минһажетдинова, “Ғаилә” көнсығыш район-ара үҙәге директоры Юлия Казанцева тәбрикләне.

Үҙ сиратында, Айгөл Айрат ҡыҙы оҙаҡ йылдар ҡулға-ҡул тотоношоп ғүмер ебен һүткән өлгөлө парҙар - алтын юбилейҙарын билдәләгән Фәүнә һәм Шәфҡәт Ишбирҙиндәрҙе, 60 йыл бергә татыу донъя көткән Рәмзиә һәм Кинйәбулат Мөхәмәтйәровтарҙы ҡотлап, иҫтәлекле бүләктәр тапшырҙы.

Республика, төбәк-ара конкурс-фестивалдәрҙә лайыҡлы сығыш яһап, район данын яҡлаған дәртле, берҙәм ғаиләләр ҙә саранан ситтә ҡалманы. 2022 йылда “Өлгөлө ғаилә” республика конкурсында - I, “Ҡомартҡы” республика йәштәр форумында II урын яулаусы Ғәлиуллиндар (Шығай), 2007 йылда “Рәсәй ғаиләһе” фестивале номинацияһы лауреаттары, “Мөхәббәт һәм тоғролоҡ” миҙалы менән бүләкләнгән Шәғәлиндар (Үткәл), ижади, талантлы ғаиләләр - Серегиндар (Үрге Әүжән), Петровтар (Туҡан) сағыу, дәртле сығыштары менән һөйөндөрҙө.