“Театраль” ҡамыр рецебы

Был йәһәт кенә баҫылған ҡамыр төрөн ни өсөн “театраль” тип атағандарҙыр, уныһы билдәһеҙ, әммә унан бына тигән тәмле, һәр саҡ уңып бешкән бәлеш-бөйөрөктәр әҙерләргә мөмкин. Ҡамыр өсөн 30 г пресланған сүпрә (йә бер ҡап ҡоро сүпрә), 17 аш ҡалағы (өймәкәй итеп) бойҙай оно, 100 г иретелгән маргарин йә аҡ май, 200 мл йылы һыу, 1 сәй ҡалағы тоҙ, 2 сәй ҡалағы шәкәр ҡомо кәрәгер.

Әҙерләү ысулы: йылы һыуҙа сүпрәне иҙеп, шәкәр ҡомо, тоҙ һалып болғайбыҙ. Ул күпереп сығыу менән он, маргарин өҫтәп, йомшаҡ ҡына итеп ҡамыр баҫабыҙ һәм өҫтөн ябып, 30 минутҡа һыуытҡысҡа ҡуябыҙ. Унан һуң бүлмә температураһында йәнә 20 минут самаһы ултыртып торабыҙ.

Әгәр асыҡ бәлеш йә пицца бешерһәгеҙ, ҡамырҙы формаға ҡул менән йәйеп һалығыҙ (йәбешә тиһәгеҙ). Бөйөрөк йә күмәстәр әүәләгәндә иһә ҡулға ҡамыр йәбешмәҫлек итеп он өҫтәргә мөмкин. Эслек һеҙҙең ҡарамаҡҡа. Бәлеш-бөйөрөктәр өҫтөн йомортҡа менән һылап, 20 минутҡа 180 градусҡаса ҡыҙҙырылған мейескә ҡуябыҙ. Сәйҙәрегеҙ тәмле булһын!

Автор: Нэркэс Сулейманова

Читайте нас