"Йәш шайморатовсылар балы" үтте

Төбәк етәксеһе "Шайморатов" кластарының иң яҡшы уҡыусыларын сәләмләне.

– Бөгөн – һәр берегеҙҙең тормошонда мөһим көн. Мин һеҙгә һоҡланып һәм ихтирам менән ҡарайым, сөнки һеҙ ошо исемде ғорурлыҡ менән йөрөтөү өсөн еңел булмаған юл үттегеҙ, - тине Радий Хәбиров.

Башҡортостан Башлығы Ватан һәм Башҡортостан тарихында Рәсәй Геройы, генерал-майор Миңлеғәле Шайморатовтың айырым ролен билдәләп үтте.

– Шайморатовтың исеме беҙҙең менән мәңге булырына ышанам. Ул үҙенсәлекле кеше, күренекле хәрби етәксе, башҡорт халҡының данлы улы булды. 2022 йылда республикабыҙҙа МХО-ла ҡатнашыу өсөн тәүге ирекле хәрби подразделениелар ойошторола башлағас, яугирҙәр шунда уҡ: "Беренсе батальон генерал Шайморатов исемен йөрөтәсәк", - тине. Һәм беҙ улар менән ғорурланабыҙ. Шайморатовсы булыу - ҙур хөрмәт, - тине төбәк етәксеһе.

Иҫегеҙгә төшөрәбеҙ, "Шайморатов" кластарын тәүге тапҡыр 2020 йылдың көҙөндә Өфөләге 44-се һәм 162-се полилингваль күп профилле мәктәптәрҙә, шулай уҡ Р. Ғарипов исемендәге башҡорт гимназияһында булдырҙылар. Артабан ошо тәжрибә бөтә республикаға таралды. Әлегә Башҡортостанда 251 ошондай класс бар.

Беренсе "Йәш шайморатовсылар балы" республиканың алты муниципалитетынан 230-ҙан ашыу уҡыусыны йыйҙы. Улар - уҡыуҙа яҡшы һөҙөмтәләр күрһәткән, олимпиадаларҙа, ижади һәм фәнни конкурстарҙа, хәрби-спорт ярыштарында призлы урындар яулаған, йәмәғәт ойошмалары һәм ирекмәндәр хәрәкәттәре эшмәкәрлегендә әүҙем ҡатнашҡан уҡыусылар. Башҡортостан Башлығы айырыуса яҡшы эшләгән уҡыусыларға "Йәш шайморатовсы" почет билдәһен тапшырҙы.

2-се дәрәжә "Йәш шайморатовсы" почет билдәһе менән Инйәр 2-се мәктәбенең VI класс уҡыусыһы Искәндәр Иҙрисов билдәләнде.  

Фото: glavarb.ru