Ҡоштарҙы хәстәрләп

Саф һауала уҙған сарала кескәйҙәр ниндәй ҡоштарҙың яҙын тыуған яҡҡа ҡайтыуы, ҡайһыларының йыл әйләнәһенә үҙ төйәгендә йәшәүе тураһында белемдәре менән уртаҡлашты. Халыҡ-ара ҡоштар көнөнөң тарихы ла балаларҙа ҙур ҡыҙыҡһыныу уятты. Әйткәндәй, был дата осраҡлы ғына һайланмаған: тап ошо осорҙа йылы яҡтарҙан ҡанатлы дуҫтарыбыҙ ҡайта һәм кешеләр уларҙы сыйырсыҡ оялары, тағараҡтар менән лайыҡлы ҡаршыларға тейеш.

Китапханасы “Урманда” тип аталған сағыу энциклопедияға байҡау яһап, ҡыҙ-малайҙарҙы ҡоштар менән таныштырҙы. Һуңынан кескәйҙәр тағараҡтарға ем һалып, ситтән генә ҡошсоҡтарҙыҡ тәғәм ҡылыуын күҙәтеп торҙо.

Әйләнә-тирәләге донъяны танып-белергә өйрәткән, тәбиғәткә, тереклеккә һаҡсыл ҡараш тәрбиәләгән фәһемле саранан һәммәһе лә ҡәнәғәт ҡалды.

Ольга ҒӘЛИУЛЛИНА.

Шығай ауыл”Тамъян” модель

китапханаһы хеҙмәткәре.