"Супер әсәй" флешмобы үтте

Әсәйҙәр барыһын да булдыра! Улар аш-һыу оҫтаһы ла, алтын ҡуллы тегенсе лә, тимер атты йүгәнләгән бына тигән водитель дә...!

Әсә көнө уңайынан “Тирмәкәй” башҡорт балалар баҡсаһының  “Бәйләнештә”  төркөмөндә  "Супер әсәй" тигән флешмоб үткәрелде.

- "Супер әсәй" флешмобында ҡатнашҡан әсәйҙәргә һәм уларҙы ҡеүәтләп, дәртләндереп лайктар ҡуйған төркөмөбөҙ ҡунаҡтарына ҙур рәхмәтебеҙҙе еткерәбеҙ! Бына ниндәй оҫта, егәрле, өлгөр әсәйҙәр тәрбиәләй беҙгә йөрөгән балаларҙы! Үҙҙәренең төп эшенән тыш, улар күҙ яуын алған бәйләмдәр бәйләргә лә, телеңде йоторлоҡ тәмлекәстәр бешерергә лә, хуш еҫле һабындар эшләргә лә, матур-матур гөл һауыттары, кәрзиндәр ишергә лә, йылы тәпишкәләр баҫырға ла, сәләмәт тормош алып барырға әйҙәүсе файҙалы марафондар үткәрергә лә өлгөрәләр! "Әсәнән күргән  - тун беҫкән" тигән башҡорт халыҡ мәҡәлендәге кеүек,  тәрбиәләнеүселәребеҙ ҙә  киләсәктә ата-әсәйҙәре һымаҡ бына тигән шәхестәр булып үҫеп ир етерҙәр, илебеҙгә кәрәкле белгестәр булып китерҙәр тигән яҡты өмөттәрҙә ҡалабыҙ! – ти флешмобты ойоштороусы, балалар баҡсаһы тәрбиәсеһе Зөлфиә Сәлихова.   

Фотоларҙа: үҙ эшенең оҫтаһы булған алтын ҡуллы әсәйҙәребеҙҙең ҡул эштәре.