"Тылсымлы алты нөктә" браслистар конкурсы үтте

 “Тылсымлы алты нөктә” брайлистар конкурсының төп маҡсаты - йәмәғәтселектең иғтибарын насар күргән һәм һуҡыр кешеләрҙең проблемаларына йәлеп итеү. Китапхананың һуҡырҙар йәмғиәте менән берлектә йыл һайын үткәрелгән конкурс Луи Брайль системаһын мәктәп-интернатта, штатлы уҡытыусылар, уҡытыусылар ярҙамында йәки үҙаллы өйрәнгән 13 ҡатнашыусыны йыйҙы.

Быйылғы конкурс А.И. Куприндың тыуыуына 155 йыл тулыуға арналды . Брайль шрифтын белгән ҡатнашыусыларҙың барыһы ла “Сапсан” әҫәрен һайлап, үҙҙәренең уҡыу сәнғәтен күрһәтте. Конкурсанттарҙың бурысы - алдан әҙерләнмәйенсә, рельефлы нөктәле шрифт менән баҫылған китаптан өҙөктө ҡысҡырып уҡыу. Дөрөҫ, шыма уҡыу, тиҙлек баһалана.

Алты нөктәле шрифтты белеү күреү һәләте буйынса инвалидтарға эштә генә түгел, көндәлек тормошта ла ярҙам итә.  “Брайлһыҙ бер ҡайҙа ла...”, - тиҙәр конкурста ҡатнашыусылар.

Конкурс һөҙөмтәләре буйынса Нәфисә Аҡһарина, Рәйфә Иҙелйәнова һәм Валентина Бедина призлы урындарҙы яуланы. Еңеүселәр һәм ҡатнашыусылар ҡиммәтле бүләктәр менән билдәләнде. Бөтә ҡатнашыусылар ҙа үҙ оҫталыҡтарын камиллаштырыу өсөн ҡиммәтле тәжрибә алды.

Шулай уҡ, Башҡорт китапханаһының Белорет филиалында һуҡырҙар өсөн инклюзияның көсөн һәм мөһимлеген күрһәткән үҙенсәлекле музыкаль сара үтте.  Инклюзив концерт Халыҡ-ара һуҡырҙар көнөнә арналды. Был көндө китапханала йырҙар, шиғырҙар, ҡурай һәм ҡумыҙ көйҙәре яңғыраны. Концертта ҡатнашыусыларҙы ижадҡа һөйөү һәм уны башҡалар менән уртаҡлашыу теләге берләштерҙе. Концерт сабырлыҡ һәм сыҙамлыҡ өлгөһө күрһәтеп, был сир менән көн һайын көрәшеүсе бөтә кешеләргә ихтирам һәм хөрмәт билдәһе булды.

Сара сәй табыны менән тамамланды.

Зөлфиә ЗАРИПОВА,

китапхана мөдире.