Аутентик костюмдарҙа - тарих

Үкенескә ҡаршы, бөгөн милли кейем, нигеҙҙә, стилләштерелгән сәхнә костюмы рәүешендә генә һаҡланған. Шулай ҙа һуңғы йылдарҙа ижади мираҫҡа, байрам-йолаларҙы тергеҙеүгә, фольклорға булған иғтибар милли кейемгә ҡарата мөнәсәбәтте лә ыңғай яҡҡа үҙгәртте, буғай. Ҡайҙалыр төпкөлдә бөгөн һирәк осрар милли кейем өлгөләренең һаҡланыуы, ошо боронғолоҡто түкмәй-сәсмәй йәш быуынға өйрәтер маһирҙарҙың, кейем тарихын өйрәнер белгестәрҙең булыуы ҡыуандыра.

Шығай күп тармаҡлы ауыл клубының “Аҡтамыр” халыҡ клубы етәксеһе Сәғирә Ғәлиуллинаны республикала Тамъян ырыуы ҡатын-ҡыҙҙарының аутентик костюмдарын тергеҙеү менән шөғөлләнгән иң әүҙем, эшмәкәр ҡатын-ҡыҙҙарҙың береһе булараҡ яҡшы беләләр.  

- Тау башҡорттарының XIX, XX быуаттың 20-30-сы йылдарына ҡараған төрлө йәштәге, дәрәжәләге ҡатын-ҡыҙҙарҙың көндәлек һәм байрам костюмдарын, биҙәүес әйберҙәрен, нағышлы муҡсайҙарын тергеҙеү менән 2012 йылдан шөғөлләнәбеҙ. Был йәһәттән беҙҙең музейҙа һаҡланған экспонаттар, шулай уҡ өләсәйемдең уҙған быуаттың 30-сы йылдарында төшкән фотоһүрәттәре өлгө булып тора. Бөтә күлдәктәр, кәзәкей һәм комзолдар бары тик тәбиғи туҡымаларҙан - сатин, бәз, ситсанан тегелгән, - ти Сәғирә Сабирйән ҡыҙы.