"Иҙел башы” кемпингы инфраструктураны үҫтереүҙе дауам итә

Бөгөн бында ҡунаҡтар өсөн ашхана, мунса комплексы, тир, волейбол майҙаны эшләй һәм балалар майҙансығы төҙөлөшө тамамлана. Проект  “Туризм һәм ҡунаҡсыллыҡ” милли программаһына ярашлы хупланған һәм 4,7 млн һум күләмендә субсидия алған.

- Ирәмәл традицион рәүештә туристарҙы йәлеп итә һәм беҙҙең бурысыбыҙ - ялды уңайлы һәм йылдың һәр миҙгелендә мөмкин итеү. "Иҙел Башы" биләмәне нисек эҙмә-эҙлекле үҫтереү мөмкинлеген күрһәтә: ашхана һәм мунса комплексы эшләй, тир һәм волейбол майҙанын йыһазландырҙылар, хәҙер балалар майҙансығы төҙөйҙәр. Инвестор проектҡа 8 миллион самаһы  аҡсаһын һалды һәм биләмәне төҙөкләндереүҙе дауам итә. Тап ошондай башланғыстар республиканың заманса туристик инфраструктураһын формалаштыра, - тип билдәләне Башҡортостандың эшҡыуарлыҡ һәм туризм министры урынбаҫары Владлена Елышева.

Кемпинг инфраструктураһына бер үк ваҡытта 20-нән ашыу ҡунаҡты ҡабул итеүгә иҫәпләнгән 7 модулле йорт, шулай уҡ 6 кешегә тиклем иҫәпләнгән ике ҡатлы ҡунаҡ йорто инә. Палаткалары булған туристар өсөн айырым майҙансыҡтар, душ бүлмәләре булған, шул иҫәптән сәләмәтлек мөмкинлектәре сикләнгәндәр өсөн, санитар блок ҡаралған.

Территорияһында 35 урынлыҡ ашхана эшләй. Шулай уҡ ҡунаҡтар аш-һыуҙы үҙаллы хәстәрләй ала - йорттар янында усаҡ яғыу зоналары, мангалдар һәм урам мейестәре ҡуйылған.

Әүҙем ял итеү өсөн үлән япмалы волейбол яланы һәм уҡ менән, пневматик ҡоралдан атыу өсөн тир йыһазландырылған. Велосипед, кәмәләр, палаткалар, туристик ҡорамалдар прокатҡа сығарыла.