Йәйге мәшғүллек программаһы старт алды

Беренсе төркөм эшкә тотондо ла инде. Үҫмерҙәр инструктаж үткәндән һуң комбинаттың Хеҙмәт даны музейында булып, предприятие тарихы менән танышты, буласаҡ подразделениелар тураһында ҡыҙыҡлы факттар белде. Эш оҙайлығы  - ике аҙна, көн һайын эш сәғәттәре һаны йәшенә, хеҙмәт ҡануниәте талаптарына ярашлы һәр үҫмер өсөн индивидуаль билдәләнә. Йәш хеҙмәткәрҙәргә тәжрибәле остаздар беркетелгән. Балалар махсус әҙерлек һәм квалификация талап итмәгән эштәргә йәлеп ителә: улар ҡағыҙ мәғлүмәтте электрон базаға күсерә, архив документтары менән эшләй, цех яны биләмәләрен төҙөкләндерә, йыйыштырыу, йәшелләндереү һәм сәскәләргә һыу ҡойоу менән шөғөлләнә.

- Ике үҫмер әсәһе булараҡ, миңә балалар мәшғүллеге программаһының абстракт һөнәри йүнәлеш биреү түгел, ә кешеләр тураһында булыуы оҡшай. Балалар ата-әсәләренең көндөң күп өлөшөн ҡайҙа үткәргәндәрен, нимә менән шөғөлләнгәндәрен һәм барыһы ла нисек ойошторолғанын күрә. Балалар иң тәүҙә БМК музейына барҙы, сөнки улар экскурсияны тыңлап ҡына ҡалмай, таныш йөҙҙәрҙе һәм фамилияларҙы эҙләй, яҡындарының эшләгән цехтары тураһында белә. Һәм был предприятиеға бөтөнләй икенсе ҡараш булдыра: "Бында ниндәйҙер завод бар" түгел, ә "Был беҙҙең комбинатыбыҙ, бында беҙҙең ғаилә эшләй". Өҫтәүенә, ата-әсәләргә ярҙам: йәй - балалар мәшғүллеге йәһәтенән иң ҡатмарлы ваҡыт. Ә бында үҫмерҙәр күҙәтеү аҫтында ғына түгел, улар коллективта, остаздары, аныҡ бурыстары һәм тәүге эш хаҡы менән. Ғаилә өсөн был ысынлап та мөһим, - ти комбинатта икенсе йыл инде йәйге осорҙа эшләгән Татьяна менән Кириллдың әсәйҙәре,  "БМК" акционерҙар йәмғиәте хеҙмәткәре Светлана Красикова.

- Беҙ кадрҙар резервы тураһында юғары уҡыу йорттарын һәм колледждарҙы тамамлаусылар тип уйлайбыҙ, әммә ысынында уны күпкә иртәрәк булдырырға мөмкин. Хеҙмәткәрҙәрҙең балаларын йәйге мәшғүллек менән тәьмин итеү  - шундай аҙымдарҙың береһе. Балаларҙы эшкә, етештереүгә дөрөҫ ҡараш тәрбиәләү бик мөһим. Әгәр бер нисә йылдан һуң был үҫмерҙәрҙең ҡайһы берҙәре аңлы рәүештә техник һөнәр һайлаһа һәм производствоға эшкә килһә, тимәк, беҙ дөрөҫ эшләйбеҙ. Был тиҙ һөҙөмтә түгел, әммә тап ошондай оҙайлы инвестициялар тотороҡло кадрҙар базаһын булдыра, - тип аңлатма бирҙе "БМК" акционерҙар йәмғиәтенең персонал менән эшләү идаралығы директоры Людмила Агафонцева.

Оксана БОРОВЫХ,

матбуғат хеҙмәте.