Беҙгә башҡорт телен уҡытыуҙы модалы һәм заманса итергә кәрәк

Бөгөн Башҡортостан Башлығы вазифаһын ваҡытлыса башҡарыусы Радий Хәбиров ошо көндәрҙә Өфөлә барған башҡорт теле һәм әҙәбиәте уҡытыусыларының I Бөтә Рәсәй съезыэшендә ҡатнашты.

Республика етәксеһе съезда ҡатнашыусыларҙы сәләмләне һәм төбәктә туған телде уҡытыуҙы нисек күҙ алдына килтереүе хаҡында һөйләне.

«Белеүегеҙсә, мин биш йәшкә тиклем Ишембай районының Һайран ауылында йәшәнем, һуңынан ғаиләбеҙ менән ҡалаға күсендек, аҙаҡ Мәскәүгә киттем, шулай яйлап башҡорт телен юғалта башланым. Әле миңә 55 йәш, һәм хәҙер, беҙ, ниһайәт, туған телебеҙгә ҡайтабыҙ тип әйтә алам. Алдыбыҙҙа бер нисә бурыс тора һәм мин ошо йәһәттән фекерҙәрем менән уртаҡлашҡым килә. Бөгөн беҙ балаларыбыҙҙы нисек башҡорт теленә өйрәтеү, уны уҡытыу буйынса ниндәй алымдар индереү һәм уҡытыуҙы нисек модалы, заманса итергә кәрәклеген хәл итергә тейешбеҙ. Ошо ҙур эште бергәләп башҡарырбыҙ!», — тине республика етәксеһе.

Шулай уҡ Радий Хәбиров башҡорт теле һәм әҙәбиәте уҡытыусыларына «Башҡортостан Республикаһының атҡаҙанған уҡытыусыһы» тигән маҡтаулы исем биреү тураһында билдәләр тапшырҙы.