Иң әүҙемдәр Октябрьский биҫтәһендә

Октябрьский биҫтәһендәге 1299-сы һайлау участкаһы иртәнге сәғәт 6-ла уҡ эш башланы.

Ләлә Солтангәрәй ҡыҙы Әхмәтйәнова рәйеслегендәге һайлау комиссияһы ағзалары һәм һайлау барышын күҙәтеүселәр 7 тула тигәндә һайлауҙы Башҡортостан гимны менән асып ебәрҙеләр. Зал һайлауға ярашлы матур биҙәлгән. Тәүгеләрҙән булып тормош иптәше менән бергә тауыш биргән Гөлсөм Урал ҡыҙы Байрамғолова бүләк алып ҡыуанды.

- Башҡортостаныбыҙҙа тыныслыҡ, татыулыҡ, һәм тотороҡлолоҡ өсөн тауыш бирәм,- ти оҙаҡ йылдар медицина өлкәһендә хеҙмәт иткән ханым.

Әйткәндәй, һайлау участкаһына тәүгеләрҙән булып килгән һәм беренсе тапҡыр һайлағандарға бүләктәр әҙерләнгән.

Һуңғараҡ бында мәктәп уҡыусыларының көҙгө йәрминкәһе башланды.