Башҡортостанда 8 айҙа 7 өс игеҙ һәм 305 игеҙәк бала тыуған

Башҡортостанда ағымдағы йылдың һигеҙ айында «Бала табыу сертификаттары»н алған ҡатын-ҡыҙҙарҙың 26 меңдән ашыу сабыйы тыуған. Уларҙың 12,5 меңе — ҡыҙҙар, 13,5 меңе — малайҙар, тип хәбәр итә республика буйынса Социаль страховкалау фонды.

Ошо осорҙа Башҡортостанда 7 өс игеҙ һәм 305 игеҙәк донъяға килгән.

Балалар күберәк шаршамбы көндәрендә тыуған - 4,3 меңдән ашыу.

Сабыйҙарҙың буйы һәм ауырлығы үҙгәрешһеҙ ҡала. Ләкин ҡайһы берҙә ысын баһадирҙар тыуа. Әйтәйек, Күгәрсен районында донъяға килгән сабыйҙың буйы - 60 сантиметр, ауырлығы - 5,58 килограмм. Ә Краснокама районында буласаҡ фотомодель тыуған, ҡыҙыҡайҙың буйы 60 сантиметр тәшкил иткән.

«2019 йылдың 8 айында «Бала табыу сертификаты» программаһы сиктәрендә Социаль страховкалау фондының төбәк бүлексәһе республиканың медицина ойошмаларына 281,5 миллион һумдан ашыу күсергән. Аҡсаны ҡатын-ҡыҙҙарҙың йөклөлөк осоронда медицина хеҙмәттәре өсөн ҡатын-ҡыҙҙар консультациялары, бала тапҡан һәм бала тапҡандан һуң осорҙа күрһәткән хеҙмәттәре өсөн бала табыу йорттары, сабыйҙарҙы бер йәшенә тиклем күҙәтеү буйынса хеҙмәттәре өсөн балалар поликлиникалары алған», - тип белдерҙеләр ведомствола.