"Һәр мәктәптә, һәр балалар баҡсаһында сүп-сар айырым йыйылырға тейеш»

Бөгөн хөкүмәттәге оператив кәңәшмәлә Радий Хәбиров барлыҡ дәүләт учреждениеларында, мәктәптәрҙә һәм балалар баҡсаларында сүп-сарҙы айырым йыйыуҙы ойошторорға ҡушты. Уның фекеренсә, шул рәүешле республикала йәшәүселәрҙең бала саҡтан уҡ сүп-сарҙы сорттарға айырыу ғәҙәтенә инер.

Оперативкала рөхсәтһеҙ асылған сүплектәр мәсьәләһе лә тикшерелде. Туғыҙ айҙа уларҙың ундан бер өлөшө генә юҡ ителгән. Ошолай яй эшләүҙең сәбәбе - муниципалитеттарҙың аҡсаһы етмәүҙә.

Экология министры вазифаһын башҡарыусы Урал Искәндәров 1200 градуслыҡ температурала ҡый яндырған һәм ҡалдыҡтарҙы таҙартыу өсөн фильтрҙары булған күсмә сүп-сар яндырыу ҡулайламалары һатып алыу тәҡдимен индерҙе. Радий Хәбиров тораҡ пункттарҙан алыҫта ошо ҡулайлама менән тәжрибә үткәрергә һәм уларҙың экологик стандарттарға тап килеү-килмәүен тикшерергә ҡушты.