Хакимиәт башлыҡтары өсөн республика семинар-кәңәшмәһе

Бөгөн Нефтекама ҡалаһында республиканың башҡарма власть органдары етәкселәре, ҡала округтары һәм муниципаль район хакимиәттәре башлыҡтары өсөн семинар-кәңәшмә үтә. Уның эшендә Башҡортостан Башлығы Радий Хәбиров та ҡатнаша.

– Беҙ һеҙҙе яңы йүнәлештәрҙе асыҡлау, ошоғаса бергә башҡарылған эш һөҙөмтәләре хаҡында фекер алышыу, киләсәккә бурыстар билдәләү өсөн йыйҙыҡ, – тине төбәк етәксеһе. – Былтырғы йыл һөҙөмтәләре – ул беҙҙең уртаҡ уңыш, уртаҡ ҡаҙаныш. Сәнәғәт етештереүсәнлеге индексы – 104,2 процент. Был бик юғары һөҙөмтә. Беҙ Рәсәй буйынса уртаса күрһәткестән өҫтәрәкбеҙ. Төп капиталға инвестициялар – беҙҙең үҫеште билдәләүсе төп күрһәткес – 14 процентҡа артты. Был һан тағы ла нығыраҡ ҡыуандыра. Ул һауанан алынған күрһәткес түгел. Бик аҙ ғына төбәктәр ундай һөҙөмтәләргә эйә. Минеңсә, беҙ нисек эшләргә кәрәклекте дөрөҫ һиҙемләнек. Әгәр 2020 йылда ла ошолай эшләһәк, беҙҙе бик ыңғай һөҙөмтәләр көтәсәк.

Семинарҙа ҡатнашыусылар төбәктең социаль-иҡтисади үҫеше, эшҡыуарлыҡты яҡлау, ҡаты көнкүреш ҡалдыҡтарын эшкәртеүҙе ойоштороу, Бөтә донъя фольклориадаһына әҙерлек, Зауыҡлы биләмәләр йылына ярашлы биләмәләрҙе төҙөкләндереүгә ҡағылышлы көнүҙәк һорауҙарҙы тикшерә.

"Башҡортостан" гәзите сайтынан. Фото: glavarb.ru