Эшҡыуарҙар кәңәш ҡора

Иртәгә көндөҙгө сәғәт 4-тә “Бизнес-изоляция: талаптар һәм ҡарарҙар” онлайн-конференцияһы ойошторола. Сараның маҡсаты – көрсөк күренештәре менән осрашҡан Башҡортостан эшҡыуарҙарына мәғлүмәти ярҙам күрһәтеү.

Онлайн-конференцияла төрлө өлкәләрҙәге эшҡыуарҙар яңы иҡтисади шарттарҙа үҙҙәренең хәле һәм ҡарарҙары менән уртаҡлаша. Һатыуҙың кәмеүе, сикләү сараларының йоғонтоһо, ҡулланыусыларҙа ихтыяждың артыуы кеүек көнүҙәк мәсьәләләрҙе ҡарау күҙаллана. Һәр эшҡыуар тыуған проблемаларҙы хәл итеү юлын тәҡдим итеп, тармаҡ буйынса коллегаларының һорауҙарына яуап бирәсәк.

Башҡортостан Хөкүмәтенең премьер-министр урынбаҫары Андрей Назаров, Рәсәй Иҡтисади үҫеш министрлығының Инвестиция сәйәсәте һәм эшҡыуарлыҡ үҫеше департаменты директоры Милена Арыҫланова, “Wildberries” компанияһының генераль директоры Татьяна Бакальчук, футуролог, Рәсәйҙең Монополияға ҡаршы федераль хеҙмәте етәксеһе кәңәшсеһе Михаил Федоренко, шулай уҡ федераль һәм төбәк кимәлендәге уңышлы эшҡыуарҙар конференцияның спикерҙары ҡатнашасаҡ.