Ярҙам саралары ҙур әһәмиәткә эйә

Рәсәй халҡының 81 проценты ил Президенты Владимир Путин 11 майҙа тәҡдим иткән ярҙам саралары ҙур әһәмиәткә эйә ти.

Бөтә Рәсәй йәмәғәтселек фекерен өйрәнеү үҙәге мәғлүмәттәренә ҡарағанда. Шул уҡ ваҡытта респонденттарҙың 66 проценты был сараларҙың бизнес өсөн мөһимлеген дә билдәләне.

Рәсәйҙәрҙең күпселеге (73 %), дәүләт башлығы коронавирус пандемияһының кире эҙемтәләренә бәйле хәлде яйға һалыу өсөн мөмкин булғандың барыһын да эшләргә тырыша, тигән фекерҙә. Граждандарҙың өстән ике өлөшө (67 %) Рәсәйҙәге хәлде Президент контролдә тота тип инана. Халыҡтың 66 проценты Владимир Путиндың ысын хәлде һәм кешеләрҙең проблемаларын аңлауына ышана. Һорау биреү сараһында ҡатнашҡандарҙың 75 проценты әйтеүенсә, дәүләт етәксеһенең телевидение аша мөрәжәғәте уларҙа ыңғай тәьҫир ҡалдырған.

Социологтар билдәләүенсә, 16 йәшкә тиклемге балаларға 10-ар мең һум аҡса түләү, эшләмәгән граждандарға бала ҡарау өсөн минималь пособие күләмен ике тапҡырға арттырыу (93 %), апрель-июндә өс йәшкә тиклемге сабыйҙарға бишәр мең һум түләү (92 %), ете йәшкә тиклемге балалары булған аҙ тәьмин ителгән ғаиләләргә субсидия биреү (91 %) кеүек ярҙам саралары халыҡтың ыңғай баһаһын алған.

Санитария нормаларын үтәү шарты менән төп тармаҡтарҙағы предприятиелар эшен тергеҙеүҙе халыҡтың 89 проценты, үҙмәшғүлдәргә уҙған йыл өсөн һалымды ҡайтарыуҙы – 76, коронавирусҡа көн һайын үткәрелгән тестар һанын 300 меңгә тиклем арттырыуҙы 75 проценты хуплаған.

Фото: kurobr.spb.ru