“Картамдан ҙур суммала аҡсалар юғалды”. Рәсәй Эске эштәр министрлығының Белорет районы буйынса бүлегенә урындағы халыҡтан шундай эстәлекле бер нисә ғариза килгән.
Мутлашыусылар ҡорбандарының береһе – Белоретта йәшәүсе 40 йәшлек ханым. Уның һөйләүенсә, бер көндө ханымдың телефонына билдәһеҙ кеше шылтырата һәм үҙен банк хеҙмәткәремен тип таныштыра.
“Һеҙҙең карта буйынса шикле операциялар башҡарыла, хәлде асыҡлау өсөн смс-кодтар кәрәк”, – ти шылтыратыусы. Ханым уны-быны уйлап тормай, кодтарҙы әйтә. Шунан һуң мутлашыусы ҡатындың картаһынан 430 мең һумдан күберәк аҡсаһын урлай.
Белоретта йәшәүсе 44 йәшлек ханым да шундай ҡараҡтар ҡулына эләгә. Был юлы мутлашыусы: һеҙҙең банк картаһынан аҡса һалдырырға йыйыналар, аҡсаларҙы хәүефһеҙ һаҡлау өсөн уны икенсе иҫәпкә күсерергә кәрәк”, – тип смс-кодтар һорай. Был ханымдың картаһынан 103 мең һумдан күберәк аҡсаһы юғала.
Осраҡтар буйынса енәйәт эштәре ҡуҙғатылған, тикшереү бара.
Белорет эске эштәр бүлегенең матбуғат хеҙмәте.