68-се үлем осрағы теркәлде

Башҡортостанда яңы коронавирус инфекцияһынан 68-се үлем осрағы теркәлде. Был хаҡта республика хөкүмәтендәге оператив кәңәшмәлә һаулыҡ һаҡлау министры Максим Забелин әйтте.

Башҡортостандың Һаулыҡ һаҡлау министрлығы етәксеһе һүҙҙәренсә, пандемия башланғандан һуң 12 444 кешелә COVID-19 раҫланған, һуңғы тәүлектә – 116 кешелә. Дауахананан тыш пневмония менән ауырыу буйынса мәғлүмәттәр һуңғараҡ иғлан ителә.

Коронавирус раҫланған 318 пациент стационарҙа дауалана, уларҙың 32-һе – ауыр хәлдә, алтауһы – үпкәне яһалма елләтеү аппаратында. Ошо ваҡыт эсендә 11 110 кеше һауыҡҡан.