Донъялағы иң ҡиммәтле укол яһалды

19 августа арҡа мускулдары атрофияһы менән яфаланған Полина Елсукованың ғаиләһенә табип шылтыратып, лотереяла ҡиммәтле "Золгенсма" уколын отоуҙары тураһында хәбәр итә. Был препаратты эшләп сығарған компания шулай ваҡыты-ваҡыты менән сирлеләр араһында лотерея уйната.

Был Елсуковтар өсөн иң ҡыуаныслы яңылыҡ була, сөнки баланың ике йәше тулғансы 160 миллион һум торған уколды һатып алып, яһап өлгөрмәһәләр, сабыйҙың йәшәргә өмөтө ҡалмай ине.

Шунан бирле ғаилә клиникаға саҡырыу көтә башлай. Уға тиклем Полина реабилитация үтеүен дауам итергә тейеш була, бының өсөн ҡорамалдар һатып алына.

30 ноябрҙә Екатеринбургҡа самолетта осоп килгәс, Елсуковтар ковидҡа тест үтә. Ниһайәт, 4 декабрҙә ҡыҙ балаға донъялағы иң ҡиммәтле укол яһала. Хәҙер ул атлап китер, ҡәҙимге тормош алып барыр тигән ышаныс нығынды.