Йорттарға капиталь ремонт эшләү дауам итә

2014 йылда башланған һәм 30 йылға иҫәпләнгән күп фатирлы йорттарҙағы дөйөм мөлкәтте капиталь ремонтлау республика программаһына 17 023 бина индерелгән, шуларҙың 5 050-һе Өфөлә урынлашҡан. Һуңғы алты йылда республикала 6,5 мең йортта эштәрҙең бер йәки бер нисә төрө башҡарылған. 2020 йылда 800 күп фатирлы йортта дөйөм суммаһы 4 миллиард һумға капиталь ремонт эшләнгән.

Башҡортостанда капиталь ремонт буйынса эштәрҙең бөтә төрҙәренә лә гарантия – 5 йыл. Был осорҙа подрядсы асыҡланған етешһеҙлектәрҙе үҙ иҫәбенә бөтөрөргә тейеш ( вандализм һәм башҡарылған ремонттың сифатына ҡарамаған башҡа факторҙарҙан тыш).

2021 йылда Белоретта ла 9 күп фатирлы йорттоң ҡыйығын алыштырыу ҡаралған. Ҡаланың Косоротов урамының 10-сы, 15-се, 16-сы, Точисский урамының 17-се, 19-сы, 26а, Киров, 40а һәм Тюленин, 34/4 йорттарында ҡыйыҡтар алыштырылһа, Точисский,19 һәм Крупская, 43 йорттарының тышҡы йөҙөн яңыртыу, йылытыу ҡаралған.

Быйыл 4 йортта лифт ҡорамалдарын яңыртыу планлаштырылған. Ленин урамының 34-се,73-сө, Ғафури урамының 34-се һәм К.Маркс урамының 46-сы йорттарында йәшәүселәр яңы ҡорамалдар менән файҙалана аласаҡ. Ә ике йортта – Точисский, 36 һәм Октябрҙең 50 йыллығы, 60-сы йорттарҙың йылытыу системаһында ремонт эштәре көтөлә.