Рәсәй Президентынан - Маҡтау ҡағыҙҙары

Коронавирус инфекцияһы мәлендә Белорет үҙәк район клиник дауаханаһы хеҙмәткәрҙәренә лә ауыр хәлдә булған сирлеләр менән эшләргә тура килде...

18 февралдә Башҡортостан Хөкүмәте премьер-министры Андрей Назаров республиканың 70-ләгән медицина хеҙмәткәренә COVID-19 пандемияһы мәлендә медицина ярҙамы күрһәтеүҙә индергән өлөшө өсөн Рәсәй Федерацияһы Президентының Маҡтау ҡағыҙҙарын тапшырҙы.

Бүләкләнгәндәр араһында юғары категориялы табип, Белорет үҙәк район клиник дауаханаһының йоғошло ауырыуҙар бүлексәһе мөдире Гөлнара Дамир ҡыҙы Хәсәнова ла бар ине.

Андрей Назаров республика һаулыҡ һаҡлау хеҙмәткәрҙәренең барыһына ла рәхмәт һүҙҙәрен еткереп, тантаналы ваҡиғаның Ватанды һаҡлаусылар көнө алдынан үтеүе осраҡлы булмауын билдәләп үтте.
- Табиптарҙы, фельдшерҙарҙы, медицина хеҙмәткәрҙәрен был залға рәхмәт һүҙҙәрен еткерер өсөн саҡырҙыҡ. Пандемия шарттарында нәҡ һеҙ, ысын мәғәнәһендә, Ватанды һаҡлаусыларға әүерелдегеҙ, - тине Хөкүмәт етәксеһе.
Премьер-министр Башҡортостан Башлығы ҡарары менән быйылғы йылдың Һаулыҡ һәм әүҙем оҙон ғүмерлелек йылы тип иғлан ителеүен һәм киләсәктә республика һаулыҡ һаҡлау өлкәһендә етди үҙгәртеүҙәр булыуын билдәләп китте. Залдағыларҙы тағы ла тәбрикләп, һаулыҡ һаҡлауҙың ошондай һөҙөмтәле системаһы менән иң ҡатмарлы мәсьәләләр ҙә хәл ителеүен һыҙыҡ өҫтөнә алды.

Фото: Белорет дауаханаһы сайтынан.