COVID-19 менән ауырығандар тулыраҡ диспансеризация үтергә мөмкин

Бындай диспансеризация ике этапта ойошторола. Уларҙың тәүгеһенә ете тикшереү индерелгән: ҡандың дөйөм һәм биохимик анализы, ҡандың кислород менән туйыныу кимәлен үлсәү (сатурация), 6 минут атлап тест үткәреү, спирометрия, күкрәк ситлегенә рентген эшләү, терапевҡа инеү. COVID-19 менән сирләгәндәр өсөн был исемлеккә ҡанда D-димер концентрацияһын билдәләү анализы өҫтәлә. Уның ярҙамында тромб барлыҡҡа килеү билдәләрен асыҡларға мөмкин. Был тикшереүҙәрҙе бер көндә үтергә була.

«Уларҙың һөҙөмтәһе буйынса табиптар хроник сирҙәрҙең үҫеш билдәләрен һәм хәүефен билдәләй, кәрәк булған осраҡта, диагнозды аныҡлау өсөн пациент икенсе этапҡа ебәрелә. Унда эхокардиография, үпкәгә компьютер томографияһы үткәреү һәм аяҡтың ҡан тамырҙарына допплер тикшереүе ҡаралған. Әгәр диспансеризация һөҙөмтәләре буйынса пациентта хроник ауырыуҙар йәки уларҙың барлыҡҡа килеү хәүефе асыҡланһа, уға дауалау һәм медицина реабилитацияһы тәғәйенләнә», — тип белдерҙеләр Башҡортостан Республикаһының Һаулыҡ һаҡлау министрлығында.

Тулыраҡ диспансеризация үтергә мөмкин булған медицина ойошмаларының исемлеге төбәк һаулыҡ һаҡлау органдарының рәсми сайттарында һәм берҙәм дәүләт хеҙмәттәре порталында баҫыла.

Яҡынса мәғлүмәттәр буйынса, бындай диспансеризация 1 июлдән башлана.