Коронавирустан бер аҙнала 60 кеше мәрхүм була

Бөгөн Хөкүмәттә үткән оператив кәңәшмә, ғәҙәт буйынса, коронавирусҡа бәйле һуңғы яңылыҡтар менән таныштырыуҙан башланды. Доклад менән һаулыҡ һаҡлау министры Максим Забелин сығыш яһаны. 9 августың иртәнге 10 сәғәтенә ҡарата республикала коронавирус менән сирләгән 50612 пациент теркәлгән, һуңғы тәүлектә - 275 кеше. Сирлеләрҙең 93 проценты - 46223 кеше һауыҡҡан. Һуңғы тәүлектә - 41 кеше. 2888 кеше амбулатор шарттарҙа дауалана, 654-е - стационарҙа. Уларҙың 49-ы интенсив терапия бүлегендә, 7 пациент үпкәне яһалма елләтеү аппаратына тоташтырылған. Ҡыҙғанысҡа ҡаршы, инфекциянан һәләк булғандар һаны ла арта. Һуңғы тәүлектә 8 кеше вафат булһа, бер аҙнала 60 кешенең ғүмере өҙөлгән. Бөтәһе пандемия башланғандан алып 847 кеше вирус ҡорбаны булды.

Вакцинацияға килгәндә, прививканың беренсе компонентын - 1002869 кеше алған, тулыһынса вакцинацияны 782354 кеше тамамлаған. Әле Башҡортостанға 17 мең доза “СпутникЛайт” вакцинаһы килгән, уны теркәү бара. Республикала бөтәһе 208 вакцинациялау пункты эшләй. Радий Хәбиров министрҙан коронавирустан прививка яһатҡан кешеләрҙең үлеүе осраҡтары булдымы тип һораны.

Мининстр белдереүенсә, коронавирустан һәләк булғандар - вакцинация үтмәгән, ауыр хроник сирҙәре булған һәм башлыса 60 йәштән өлкәндәр (80 процент).